HOUSTON, TEXAS.- Outoridatnan na Texas, Merka a kuminsá ku un investigashon kriminal djasabra despues ku durante un konsierto di rap grandi di Travis Scott ku a tuma lugá djabièrnè último,  a surgi un tragedia ku a laga ocho persona morto i vários persona ku a keda transportá pa hospital.

Mas o ménos 50 mil persona tabata presente na NRG Park djabièrnè na momentu ku e públiko a kuminsá pusha pa bai direkshon di stage durante e presentashon di Scott, kreando dje forma aki un káos.

‘Hendenan tabata wòrdu pushá, otronan a keda trapá i ami a logra di bringa pa sali afó, ma mira yen hende abou na suela, asina un testigu ku tabata presente na e konsierto a deklará na AFP.

Un otro testigu a indiká ku tabatin uso eksesivo di alkohòl i droga den e públiko. ‘E hendenan dor dje kalor a kuminsá kai flou di tur banda, anto e otronan no a preokupá. Nan a trapa riba nan o a ignorá nan. E situashon tabata hopi tenso’.

E alkalde di Houston a konta reporteronan djasabra atardi ku e tragedia a laga 8 persona morto, entre 14 pa 27 aña, ku un ku su edat no ta konosí ainda. E káos a resultá den 25 persona transportá pa hospital di kua 13 ainda tabata risibí kuido.

Mas ku 300 persona a keda tratá na e sitio pa heridanan leve.

Scott a para su presentashon na diferente okashon ora ku el a tuma nota dje situashon den públiko. E rapper a keda konmoví pa loke ku a sosodé. ‘Mi orashonnan ta bai pa e famianan i tur esnan ku a keda afektá pa loke a sosodé na Festival Astroworld’, asina Scott a twitt djasabra.

Mas di 520 polis i 750 bewaker tabata presente na e festival.

Investigashon den e kaso ta sigui.

 

LAGA UN KOMENTARIO

Please enter your comment!
Please enter your name here