Kasi tres aña pasá ora Daphne Bos a bin Kòrsou bèk despues di a biba 35 aña na Ulanda kaminda el a studia i traha, el a disidí di kuminsá ku e produktonan “Dushi U”. Produktonan ku for di habon trahá a base di ingredientenan natural. Produktonan natural trahá a base di zeta di koko, esei ta loke Dushi U ta para pe.

Den su kurá, bou di dushi palu di fruta Daphne a konta Djasabra kon el a kuminsá i te kaminda e ta awe. Dushi U ta un kompania ku el a lanta i e ta su pashon. Nunka el a traha habon promé te ku dos aña pasá. El a ripará habonnan tabata hasi su kueru seku i el a kuminsá investigá i traha su mes habon. Ora el a kuminsá, sin e nòmber el a buska el a bin ku e nòmber Dushi U ku ta spesial pa su klientenan.

 

Zeta di koko…

 

Loke ta hasi Dushi U apart di otronan segun Daphne ta ku e habonnan ta 100% zeta di koko orgániko. I esei ta hasié apart di otronan. Tambe e tin algun otro habon ku otro zeta pero mayoria di zeta di koko orgániko. E ta gusta pa nan hole dushi pasobra e mes tambe ta baña kuné. E ke malaria su mes i meskos e ke pa otro hende malkriá nan mes.

 

Kada habon ku nan nòmber…

E tin habon di hende hòmber i pa hende muhé. E tin unu ku tin mango den dje ku yama Mi Isla i e ta bende masha bon i tin kolónan di Kòrsou den dje. Tambe e ta usa, matanan den naturalesa. Tambe e tin Savage ku ta spesial pa hende hòmber. Pero tambe lavender, lamungras ku hende ta gusta i hopi otro holó mas ku ta trahá ku fruta mas pa hende muhé i tin un balm di Cashmer ku tin un holó masha dushi. Tur su habonnan tin un nòmber pa asina e por distinguí nan i pa ora hende mester nan sa presis ta kua.

 

Purba tur zeta…

Ora Daphne a kuminsá traha habon, el a dura den su promé salida 4 ora pasobra e tabata eksperimentá. E promé el a traha ku Crisco (produkto ku ta kushina kuné). Bo por traha habon ku tur zeta ku bo ke. Pa eksperimentá el a hasié ku Crisco pero e no a gust’é. I asina el a sigui purba tur otro zeta i el a gusta zeta di koko ku por sierto ta bon pa kueru di hende tambe.

 

Daphne a menshoná e habon di kadushi ku e tin ku den dje e ta pone realmente e puiru di kadushi. Tambe ta un habon masha gustá. Pero tambe e tin ‘scrup’.

 

Te ainda Daphne su habonnan ta bende na Kòrsou so, pero el a bisa ku tin masha hopi turista ta kumpra su habonnan i ta bai ku nan afó. Su habonnan a bai Sur Amérika. Oropa, Saudi Arabia, China, India i tur ta duna nan reakshonnan bèk serka dje.

 

Promové Kòrsou…

 

Despues di a kaba skol na Kòrsou Daphne a bai studia pa asistente botikario. Sinembargo ora el a kaba su estudio e no tabata gusta mashá loke el a studia pe i el a bai skol bèk i a bai den direkshon di atministrashon. Na Ulanda e tabata un coach trainer i un kompania ku 2.5 mion kliente. Un kompania di koriente. Daphne su kasá tabata gusta Kòrsou i e kier a bin biba aki i p’esei nan a hasié, sinembargo bèk na Kòrsou e no por  a haña trabou siendo su kasá si. El a haña un trabou tanten na un Callcenter pa bende energia pero no ta loke e tabata ke. El a disidí di bai sinta na kas pa e buska kiko e ke hasi. Un dia el a wak na televishon kon hende ta traha habon i el a kuminsá pa trein pasobra e ta sigur ku e por hasié mihó.

Daphne ta masha orguyoso i ta su intenshon di promové Kòrsou den eksterior. I p’esei e nòmber Dushi U i tur e nòmber di habonnan ta di Kòrsou, nòmbernan na papiamentu pa e laga otronan siña konosé nos dushi isla.

 

Liña spesial pa hende hòmber…

 

Banda di su habonnan di tur ora, e tin habon pa temporada tambe. Pa dia di San Valentino e tabatin e habon Dushi i pa dia di Mama tambe tabatin unu spesial. I meskos pa temporada di fin di aña tambe e tin produktonan spesial.  I banda di esakinan Daphne tin mas kos ku e ke hasi. E tin un produkto nobo ku ta su liña di hende hòmber. El a pasa un tempu investigando i a hasi e eksperimentonan riba su kasá pa asina e entregá un bon produkto. E liña aki ta inkluí tambe krema spesial pa feita kara.

 

Proseso pa traha e habon…

Pa loke ta e proseso pa traha e habon ta lo siguiente; e ta traha 100 habon riba un dia. E bar ta masha fásil pero tin habon basta difísil i e ‘swirls’ nan ku e ta hasi ku nan por hasié mas kompliká. E habonnan tin di para 4 pa 6 siman promé ku nan por subi merkado.

Trahamentu di habon no ta fásil. Daphne ta traha habon for di skrèch. E base ta Lye, awa i zeta i esei ta e habon. ‘Lye’ ta un produkto ku por kome bo kueru pero ora ta traha habon dor di e proseso di zeta e ta ‘lye’ ta disparsé. Pa traha e habon, e proseso ta trese kuné ku bo tin di usa hanskun, brel i ‘mondkap’ pa asina bo no inhalá e produkto ku e ta saka. Tambe tin di laga e proseso kana serka dje sigur 6 siman. I  e produktonan ku e ta usa por ehèmpel e kadushi ta di Kòrsou mes i e otronan ku  e ta usa di eksterior mester tin aprobashon di FDA pa asina e ta sigur ku loke e ta kumpra ta esei ta loke tin den produkto en kuestion. E tin sertifikado di garantia pa su produktonan ku e ta importá pa traha kuné.


Un perfekshonista…

E trahamentu di habon no ta sosodé henter aña. Den ougùstùs pa sèptèmber e no ta traha habon pasobra ta muchu kalor i e tin efekto riba su habonnan. Den e lunanan ei e ta hasi algu otro. Daphne ta un perfekshonista i si e habon no ta bon e no ta sali for di kas. I si e habon no ta nèchi tampoko e ta sali. I e ‘verpaking’ mester ta bon, e kaha i plèstik. Su kasá mes a traha sierto kahanan di palu ku ta tuma dos òf kuater habon ku ta ideal pa hasi regalo.


Tep…

Tin hopi hende ora ta feita ta usa e kremanan spesial. Kòrda wak riba e paki pasobra e tin hopi kos den dje ku no ta bon pa kueru. Esei ta den tur kos ku bo ta usa. Wak e ingredientenan i wak bon kiko ta usa pa bo kueru.

Daphne ta alkansabel na 673-3351

LAGA UN KOMENTARIO

Please enter your comment!
Please enter your name here