VIENTIANE, LAOS, MERKA, AP.- Miéntras e kadavernan pa trafikashon di droga ta akumulá, e presidente di Filipina, Rodrigo Duterte t a partisipando na e kumbre di Asosiashon di nashon Sùitost Asiátiko, kaminda e ta uni un serie di lidernan diferente, inkluyendo algun ku tambe ta den mira di organisashonnan defensor di derechonan humano.
E mandatario filipino ta trese antesedentenan bastante dudoso den e kumbre riba tereno di derechonan humano, pero ku no ta mal mirá pa mayoria di e asistentenan di e reunion di dies nashon di e bloke ASEAN.
” Pa mayoria di e lidernan di ASEAN, Duterte ta representá un era mas mahos i brutal, ku ta daña esfuersonan di SEAN di presentá su mes komo un bloke komersial kada biaha mas moderno i progresista, enfoká riba komersio i no riba kuenta diario di esnan ku ta muri na man di polis”, asina Phelim Kine a bisé, kende ta di Human Rights Watch, un organisashon di New York.
Duterte tabata alkalde di e siudat Davao durante basta aña, kaminda el a kuminsá haña fama komo un luchadó kontra delinkuensia. Desde ku el a asumí presidensia dia 30 di yüni, su kampaña ta konta sospechosonan di narkotráfiko i konsumo di droga a laga mas di 2.000 morto. Mas di 600.000 persona, mayormente adikto na droga, a entregá, aparentemente pa miedu di wòrdu tirá.
” E dinámika aki ta impliká ku Duterte por ta esun ku ta haña mas atenshon na Laos huntu ku otronan manera e diktador di Campoya Hun Sèn, representantenan di e maneho militar di Tailandia i anfitrionnan outoritario di Laos”. E lidernan aki ta hustifiká abusu di lei i violashon ekstrahudisial komo medio pa garantisá un sosiedat safe.
Duterte, di 71 aña a papia malu di presidente Barack Obama djaluna, bisando ku si esaki kuestioná e matansanan den su pais e lo insultá e mandatario aki. Esei tabata promé ku algun ora di enkuentro programá entre ámbos.
