Emyron Paula ta na Kòrsou aktualmente, te ku otro siman sigur pa e promové su proyekto Bananie. El a kuminsá ku publikashon di e promé historia, e biahe di Bananie ku a inisiá na Kòrsou, e isla natal di Emyron. Bananie lo bira un konsepto, e beibi a kaba di nase i awor e ta bai kuminsá krese, esei ta loke nos por a komprondé di Emyron.
Emyron bai biba Ulanda 20 aña pasa pa e siña komo Verwarmingsmonteur. Durante di e estudio el a disidí di skohe pa otro direkshon ku ta Horeka i awe e ta den kuido. Ora el a yega Ulanda na 1999 “Mi a yega Ulanda mi so, sin famia si nada. Ta un hende mi a konosé i mi a keda na su kas. Einan ma kuminsá buska kas mi mes, mi a bai skol, mi a kaba skol pero ma ripara ku verwarmingsmonteur no ta pa mi”, asina el a kambia pa horeka kaminda Emyron a traha basta largu. Despues asta el a kambia bai traha den kapsalon. Dado momentu Emyron a bin Kòrsou i a keda 6 luna pa despues e regresá Ulanda i bai traha den horeka. Tabata un kaminda largu ku Emyron a kana te el a yega asina leu. El a yega aki dor di e perseveransia, konfia den su mes, traha su netwerk, kurashi di puntra i pidi yudansa, ser amabel. Emyron mes tin bia ta puntra su mes kon ta posibel el a yega asina leu.
Finansas
E ta un persona semper e ta besig ku algu. E no ta gusta sinta na kas i si e ti di hasié mes e ta skibi. Di un forma masha honesto el a bisa Djasabra ku su skibimentu no ta na nivel haltu pero el a siña dor di skibi i skibi. Asina el a skibi e historia pa su mes i a bai purba pa skibi un buki pa mucha., Ora el a kaba skibié el a buska hende pa pinta. Pero un a kuminsá pinta i a lage para i asina el a pasa di un pa otro. Esei a pone ku Emyron a laga e historia bai drumi un tiki numa. Dado momentu Corona a kai aden, tur lugá a sera i e tambe mester a bai kas. Siendo na kas, sinta sin nada di hasi el a kòrda riba su historia i asina el a sake i buska hende pa pinta atrobe. I el a logra. E persona ei tambe a gusta su historia i asina a pinta loke mester a bai den e buki. Di einan e aventura a kuminsá. Emyron mes ta pagando tur gastu di su buki riba su mes. E tabata haña sèn di fakansi i aki aya pa asina e hasi su soño realidat.
Ken ta bananie
Bananie ta un personahe riba su mes. E ta bai su mes kaminda, e no tin nada di aber ku otro hende pero e ta úniko. E historianan ta bai riba kultura, idioma, esei ta Bananie. Su komienso ta un buki di aventura. Bananie ta gusta idioma, kultura, ku ta masha importante. Si no tin kultura i idioma, bo ta un hende bashí. Bananie a kuminsá ku su buki na Ulanda i papiamentu. Bananie a kuminsá biaha i profundisá su mes den e idioma di e lugá, pa e komprondé i tin konekshon ku e hendenan di e lugá. Semper ora bo biaha. Ku e konekshon ku hende di e pais, na su idioma ta sòru pa e kombersashon por kuminsá. I no ta importá kua pais bai, sea Polen, Afrika i donde sea, si bo sa un tiki di idioma, ta esei ta e konekshon. I esei ta Bananie.
Siña idioma
Enprinsipio e ta un buki pa mucha di 0 pa 10 aña. Pero e ta tambe pa hende grandi. Por ehèmpel esun ku ke bin kore stazje na Kòrsou for di Ulanda por siña algu di nos kultura i idioma. Esei ta intenshon di e buki, e ta pa mucha pero pa hende grandi ku no por papia papiamentu bon ainda. E ta siña bu algun palabra na papiamentu.
Un imperio
Babanie ta bai bira grandi. Emyron a konta Djasabra ku e ke yega hopi leu. E ta pensa grandi ounke e a aktua chikí. El a bisa ku e ta kuminsá paso a paso pero Bananie mester bira un imperio. Programa di televishon, wega pa mucha, tshirt, pappenkast, kantikanan, muzik, Bananie ta infinito. Emyron mes no tin yu, pero su amor pa mucha a pone skibi pa mucha. “Si bo no tin yu, buska manera pa entretené otro hende. Si mi bende 400 buki, ta nifiká ku mi tin 400 yu”, asina el a bisa Djasabra ku un sonrisa.
Nos ta siña di otro
Ora e bai Bananie e ta mira su mes pasobra semper e tin sombré bisti i e ta gusta biaha pero e no tin e sèn pa por biaha tantu. I p’esei Bananie si por hasié. E lo buska informashon, papia ku hende i asina traha su buki di e paisnan ku Bananie lo pasa keiru na nan. I asina tambe e mes ta siña di e otro paisnan. Bananie ta sinja Emyron tambe. “Nos dos ta siña di otro”.
Pronto riba merkado
E buki Bananie no ta benta na Kòrsou ainda. E ta besig ku librerianan na i ora e bai Ulanda bek e lo soru pa Kòrsou haña hopi buki pa e muchanan aki por sera konosí ku Bananie. Tambe e ta besig ku e figura pa e por bende, meskos ku otro produktonan. E problema ku Emyron ta dal semper den dje ta sen. El a bisa ku e si e haña un spònser òf hende ku ke yuda, e ta habri pa papia pa asina e or subi bira grandi.l I di e forma aki tambe e ta yuda fundashonnan.
Duna na Cliniclowns
Apesar ku ta un proyekto ku awor a kuminsá, ya kaba Emyron ta duna bek. El a hasi e fundashon di Cliniclowns komo esun ku ta risibí un porsentahe di benta di kasa buki. E ta duna nan 5% di kada buki ku e bende. Siman pasa kaba el a hasi entrega di algu mas ku 400 euro na e fundashon. Emyron a bisa ku e ta un persona ku no ta pensa riba su so. I p’esei el a bai buska ken e por yuda i a dal den Cliniclowns.
Próksimo stòp
Bananie su próksimo biahe lo ta na Tanzania. Emyron a bisa ku e di dos buki ta kla skibi kaba. I Bananie a haña asta mas amigu. Ora Emyron bai Ulanda bek e lo bai pinta i pa logra ku e aña aki mes e di dos edishon di Bananie ta riba merkado. Na Ulanda por haña e buki riba email halo@bananie.nl i www.bananie.nl einan por wak e buki i lesa su historia. Emyron ta spera ku otro aña e por partisipá na e siman di buki pa e por kompartí ku muchanan di e historianan di Bananie,
