LOS ANGELES, AP.- Un serie di negoshi ta bende materialnan nesesario pa fabriká e-cigarette di mariwana, kual a invadí e merkado di cannabis na California.
Individualnan ku kier probechá di konsumidónan inosente ta produsí imitashon di e-cigarette legal, kombinando partinan idéntiko fabriká na China ku zeta di cannabis, probablemente peligroso.
E resultado ta artíkulonan di vaping, bendé na lokalnan sin un lisensia òf atraves di internèt, entregá via e-mail.
Kisas e imitashonnan falsu aki ta vinkulá ku un krísis di salú públiko. Diferente persona rònt mundu a bira malu, spesialmente despues di usa e zeta di cannabis. Shete persona a muri te ainda.
Funshonarionan di salú públiko no ta sigur kiko ta kousa e problemanan ku halamentu di rosea, sakamentu i otro síntomanan, pero California a indiká ku mayoria di e pashèntnan aki a afirmá ku a kumpra un e-cigarette na un lokalidat sin lisensia òf bendedónan ilegal, kual frekuentemente ta ofresé produktonan falsu.
E problema ta asina grave ku un di e markanan prinsipal, Kingpen, ta invirtiendo miónes pa bolbe diseñá su empake.
E distribuidor di un marka importante, Heavy Hitters, ta dediká gran parti di su portal pa denunsiá imitashonnan i a kontratá un eks fiskal federal, Priya Sopori pa yuda kombatí e imitashonnan.
Siman pasá, reguladornan estatal a drenta dos negoshi sin lisensia na sùit di California i a konfiská kasi 3 mion dòler na produkto. Outoridat a desmantelá un operashon di dies persona ku tabata produsí kartuchanan di vaping falsu diariamente, yená ku zeta di THC, e ingrediente di mariwana ku ta kousa euforia.
