Willemstad.- Mas konekshon, spitnan mas rápido i mihó sosten na klientenan. Esei ta e promesa di e Flow nobo ku kua a yama ayó na e branding ‘Flow/UTS i hasi e transishon eksklusivo pa e marka Flow.
Komo selebrashon di e mia alkansá, i kumpliendo ku su promesa, klientenan rònt Kòrsou lo benefisiá di upgrade di spit di nan servisionan eksistente sin gastu adishonal. Kuminsando awe, tur kliente lo haña upgrade di dòbel nan spit aktual, hasiendo posibel ku nan lo por disfrutá di dos biaha e entretenimentu i hopi mas.
Esaki ta loke ta sigui despues di e kampaña ‘Trahando pa bo’ ku a ser lansá resientemente. Pa ku esaki, téknikonan ta drentando den diferente bario rònt e isla pa hasi reparashonnan i proveé kasnan di famia ku konekshon mehorá i un mihó konfiabilidat en general. Te ku awe, ta vários ta e barionan ku a risibí e mantenshon dor di téknikonan i e kompania lo sigui bai rònt e isla pa garantisá ku tur bario ta risibí atenshon personal.
“Ta dos aña pasá ku Flow i UTS a kombiná nan operashonnan. Awor nos ta operashonal bou di e marka Flow, i nos kompromiso pa mantené nos klientenan konektá na loke ta mas importante, ta mas fuerte ku nunka,” tabata palabranan di Danny Macaya, Country Manager, Karibe Hulandes, Flow.
“Nos klientenan ta e sentro di tur loke nos ta hasi. Nos ta skucha nos klientenan i ke surpasá nan ekspektativa pa loke ta trata nan nesesidatnan. Nos ta enfoká pa brinda balor inigualabel ku produktonan spesialmente pa nos klientenan i servisionan ku ta kuadra pa futuro. P’esei nos ta sigui invertí den nos ret pa por duna nos klientenan e kalidat di servisio ekselente ku nan ta meresé.”
Macaya a indiká tambe ku e kompania ta poniendo atenshon spesial na famianan i studiantenan ku paketenan ku ta kombiná e mihó di e servisionan pa kas ku e konektividat mobil.
“Adishonal, komo parti di e kompromiso ku hubentut, edukashon i kultura, nos lo sigui proveé servisio di internèt grátis na tur skolnan públiko di Kòrsou i lo subi e spitnan te ku 500Mbps,” el a indiká.
Flow su ret di HFC awor ta kubri 90% di tur kas na Kòrsou i e parti pa pasa klientenan riba e ret aki ya ta basta aselerá. Adishonal, e kompania ta instalando servisionan ku spit haltu na e parti West di e isla dor di ekstendé e ret ku e teknologia DAA (Distributed Access Architecture).
“E proyektonan aki lo resultá den un mihó eksperensia general pa e kliente i tin e potensial pa posishoná Kòrsou komo un ‘hub’ pa ‘digital nomads’, kreando interkambio internashonal balioso ku ta resultá den ingreso pa e pais.”
“Segun nos ta kuminsá un etapa nobo, nos mandato na nos klientenan lo ta guiá pa simplisidat i transparensia. Na mes momento, nos lo sigui invertí den nos retnan i nos hendenan, miéntras nos ta proveé nos komunidatnan ku e hèrmèntnan nesesario pa konektividat i oportunidatnan pa éksito,” Macaya a añadí.
