BELGRADO, Serbia (AFP).- E eks-hefe militar di e serbionan di Bosnia i kriminal di guera Ratk Mladic, kondená na kadena perpetuo pa hustisia internashonal i kende tin e apodo komo “karnisero di Bosnia” pa su ròl den e masakre di Srebrenica, a muri ayera na Den Haag.
Mladic, di 84 aña, ku tabata hopi malu ya pa algun luna, a muri den un hòspital di un prizòn na Den Haag, segun e kadena estatal serbio RTS. Su morto a keda konfirmá pa e Mekanismo Residual Internashonal di Tribunalnan Penal di Nashonnan Uní na Den Haag, ku a agregá ku e hues uruguayo Graciela Gatti Santana a ordená “un investigashon profundo riba e sirkunstansianan” di su morto.
Mladic a muri algun dia despues ku hustisia i Nashonnan Uní a rechasá e demanda di su famia i di e gobièrnu serbio pa e keda trasladá pa un hospital di Belgrado.
E general aki a dirigí e forsanan serbio di Bosnia durante dje guera di 1992-1995 i nan ta mir’é komo un héroe, pero el a kaba ku e mancha komo “konsentrashon ekstremo di maldat” pa e krímennan di Sarajevo i e masakre di Srebrenica. El a keda detené den 2011 den Lazarevo, Serbia, despues di 16 aña di hui i skonde i a keda ekstraditá pa den Haag, kaminda el a keda husgá pa Tribunal Penal Internashonal. El a keda kondená den 2017 na bida largu pa genosidio, krímennan di guera i krímennan kontra di humanidat durante e guera di Bosnia, ku a laga den kareda di 100.000 morto. E veredikto a keda konfirmá den apelashon de 2021.
Entre su krímennan ta destaká a masakre di Srebrenica, kaminda forsanan serbiobosniano bou di mando di Mladic a ehekutá den yüli di 1995 un grupo grandi di 8.000 hòmber bosnio musulman kendenan a buska refugio den loke nan a kere tabata un sitio protehá pa Nashonnan Uní.
Imágennan dje tempu ei a mustra kon e tabata parti mangel pa muchanan promé ku esakinan i e hendenan muhé a keda transportá den bùsnan miéntras ku e hòmbernan a keda hibá den áreanan alehá i ehekutá.
