E kontròlnan na porta di Isla ta keda semper

WILLEMSTAD.- No ta asina ku tin mas kontròl na portanan di Refineria Isla, loke si ta pasando ta ku awendia durante di dia pòst 5 ta sera i komo tal tur hende mester usa solamente pòst 7 (Emmastad) pa drenta i sali. Esaki lógikamente ta pone ku kisas hendenan por eksperensia esaki ku ta mas drùk na e porta. Ademas loke semper tabatin i lo keda tambe ta ‘random checks’ na ámbos porta, na palabra Earl Balborda bosero di Refineria Isla den deklarashon na EXTRA.

E echo ku mas tantu hende ta hasiendo uso di solamente un entrada ta krea e impreshon ku e kontròlnan ta mas tantu. E refineria ta pará práktikamente ketu pa hopi luna kaba i ta bini aserka ku notisianan rondó di PDVSA i e echo ku no ta kedando kla ku un partner pa tuma e operashon over, ta motibu pa lanta tur klase di spekulashon.

E informashon ku a yega mesa di redakshon di EXTRA ta bisa ku lo a amplia e siguridat na porta di Isla probablemente pa kombatí posibel ladronisia di material ku lo a kuminsá for di momentu ku trahadónan no ta haña klaridat kiko ta bai pasa ku nan kupo di trabou. Bosero di Isla na un forma kategóriko a mustra ku e informashonnan ei no ta kuadra. E departamentu di seguridat di Isla ta sigui hasi nan trabou manera semper pa perkurá pa seguridat di nivel haltu.

SHARE

LEAVE A REPLY