Kolaborashon KJ74/ Ir Sais ta haña forma:
WILLEMSTAD/ Ya kaba for di algun siman pasá fanátikonan di ICONS a risibí e notisia ku Ir Sais lo ta kolaborando riba un piesa nobo. Ademas, Ir Sais a keda konfirmá pa presentá den “Umbrella” dia 28 di sèptèmber próksimo na Landhuis Chobolobo, ku e aña aki lo tin e tema “Circus”. E kansion “E Love” ta yega na tempu pa antisipá e ‘bon vibe’ di “Umbrella”. Algun siman pasá Ir Sais tabata na Kòrsou pa grabashon di e piesa ku lo wòrdu kompañá pa su video clip. “E Love” un zouk/ ritmo kombiná estilo Iri ta un komposishon di Ir Sais mes i un areglo di Derrel ‘Titi’ De Palm.
Ta antisipá ku “E Love” lo ta realmente grandi den frekuensia na radio, konsiderando ku esaki t’e ‘comeback’ di Ir Sais riba esenario ritmo kombiná. Ir Sais tabata basta vokal resientemente tokante ritmo kombiná i a hasi un apelashon na kompositor- i areglistanan pa mantené ritmo kombiná i te asta kuminsá prepará e próksimo generashon inspirando nan pa di un manera kreativo krea fushonnan interesante ku por eksportá e ritmo mundialmente. E trayekto di Ir Sais ta kuminsá na 2020 alkansando disko di Oro, sigui pa 6x Platino na 2021- ku un máksimo di 8x Platino na 2022 pa despues alkansá e ‘Diamante’. Ir Sais t’e úniko artista ku status di ‘diamond’ na islanan ABC i a alkansá esaki na 2022 pa Dream Girl Remix feat. Rauw Alejandro. Sporádikamente e kalifikashon aki – ku a wòrdu introdusí na 1999 dor di Recording Industry Association of America (RIAA) – ta keda duná na un artista. Tur esaki ta ademas di alkansá 1 bion streams riba tur plataforma i vershon.
E kombinashon Ir Sais, Icons i KJ74 Entertainment por bira algu impaktante pa nos islanan ABC. For di awe por stream “E Love” di Ir Sais riba iTunes/ Spotify/ Tidal/ Apple Music. KJ74 Entertainment su vishon pa internashonalisá nos artistanan lokal ta hañando forma. Por mira esaki ku Amos Balentin ku a surpasá 1 mion views ku e salsa “No Me Namoro” i Rafik ku aktualmente tin 5.1 mion views pa “Tukun”. Ta invitá fanátiko- i siguidónan pa suskribí n’e kanal di KJ74 Entertainment riba YouTube i sigui sostené nos artistanan.
