Sheritsa Stroop i Jacqueline Kwidama
DIDI Deeds Foundation
DIDI Deeds Foundation ta muchu mas ku solamente beisbòl pa hóbennan. Den e kuadro aki djasabra a papia ku Sheritsa Stroop presidente i Jacqueline Kwidama tesorero di DIDI Deeds Foundation. Sheritsa ta mama di Johannes i Mariekson Gregorius “Didi”.
E fundashon a keda lantá 14 di aprel 2021 temporada di Covid, pero a kuminsá aktivamente na 2023. A kuminsá ku e vèlt pa krea e parke i na yüni/ougùstùs a lanta Didi Deeds Summer league. Tur aña tin mucha ta bai afó ku beisbòl pero tin ta keda Kòrsou i kier a hasi algu pa e grupo aki pero den deporte mes. I asina a kuminsá ku e Summer league ku ta kuminsá promé ku fakansi kuminsá i ta kaba un siman despues ku fakansi kaba. Tur organisashon di Kòrsou ta partisipá, den kareda di 700 mucha. For di T ball te Junior. E aña aki ta di 4 aña i den e kuadro aki tin Intermediate ku ta hunga tur anochi. Na 2023 ora a kuminsá, nan a show aki i aya bai diferente vèlt manera di Dòmi, Sam, Bunting i Frank Curiel. Nan kier a kuminsá i tin ora ta asina tin di kuminsá i no sinta warda e kosnan kaba. Ta dushi pa konta e sakrifisio ku por konta di dje pa por yega na e meta. E temporada ei Sheritsa a eksperensi’é masha dushi pasobra nan a drenta barionan. Jacqueline a splika ku nan a drenta Sta. Maria, Brievengat, Dòmi i finalmente a establesé na Tera Kòrá.
Nan a mustra e hendenan ku nan t’ei, asina nan a mira kon otro vèlt ta traha. Nan tabatin vèlt pero no tabatin kantina. Ta un barak nan tabatin. Ta Johnny (Johannes) ruman di Mariekson a harma tur kos. Nan tabata sali kas i yega te mardugá. E entusiasmo tabata hopi grandi i nan a sera konosí ku hopi otro. Nan a hiba e kalor pariba.
Muchu mas ku beisbòl
Didi Deeds a kuminsá ku beisbòl pero nan vishon no tabata beisbòl so, pero kier a hasi mas pa e muchanan i pa e bario. Sheritsa a bisa ku e no a nase den Tera Kòrá, pero e ta biba den Tera Kòrá, e ta parti di e bario, su yu a hunga hopi den tera, tur hende ta kòrda e esfuersonan di kue konvoi i bai trein. Tin hende ta bisa dikon Tera Kòrá pero ta einan nan a lanta. Tin hopi kas i hende ta biba den Tera Kòrá. Nan ta mira e benefisio di tin algu pa e bario. Segun nan ta papia nan ta mira mas kos ta sosodé i ta mira e legria di muchanan i mayornan. Nan por krusa kaya bai un evento, un kareoke, un ‘gym’ pasobra tur esei tin den e fundashon. Na 2024 a kuminsá e di dos aña ku torneo i a klousurá na nan vèlt. Awor nan tin dos vèlt i esei tabata nesesario pasobra tin hopi mucha, entre 90 pa 100 i tabata ke pa e muchanan bai kas tempran i p’esei tabata nesesario dos vèlt. Tin un vèlt pa mucha mas chiki i un otro pa esnan mas grandi. Tambe nan tin 3 tim di sòftbòl ta trein einan. A kontribuí pa e muchanan por bai kas trempan. Tambe nan tin un kompleho basta grandi i einan tin e kantina, bar i kushina i dos ‘batting cage’. Tin sala multifunshonal pa fiesta i zumba. E sala ta usá tambe pa diferente otro kos. Tin próksimamente un biblioteka i un museo di spòrt na kaminda. E ‘gym’ a habri aña pasá. Asina tiki tiki ta yena loke nan ke.
Turistanan ta pasa keiru
Tin hopi turista ta pasa wak pa haña e konekshon ku Didi. Asina ta mira tiki tiki e desaroyo di nan soño. Ainda no ta kla i ainda riba e vèlt tin e kònteiner kaminda nan a kuminsá. Eiden tin pañanan ku Didi a diseñá i hopi material mas ku ta usa pa deporte ku ta na benta.
Didi Gregorius mes a finansiá tur kos
Inisiadó di DIDI Deeds; e soño ta di Johnny i el a kana promé ku Didi ku e proyekto. El a kana ku su plannan pero no a logra e finansiamentu. Didi Gregorius, ku ta e ruman, ta esun ku ta finansiá e proyekto.
Sheritsa ta mama di e dos Didinan, pero e tata tambe nan tabata yama Didi. E DEEDS, segun e presidente a splika, ta pasobra na New York Didi tabata hasi Deeds esta, proyektonan karitativo i sosial pa e komunidat. I asina a yega na e fundashon DIDI Deeds. Hopi bia hende ta puntra ken ta nan spònser pero ta Didi ta esun ku a finansiá tur kos di e proyekto.
Envolví hende di bario mes
E fasilidatnan na DIDI Deeds ta na preisnan abou. Por ehèmpel pa e ‘gym’ ku ta kompletamente ku èrko, tin un preis spesial pa studiante i 60+. Nan ta habri for di 5or di mainta pero ora ta kalor ta habri atardi. Den e ‘gym’ tin hendenan di Tera Kòrá ta yuda. I esei nan ta sòru p’e, esta, laga e karanan konosí di Tera Kòrá mes traha. Sheritsa a konta kon drùk e bida di un mayor por ta. E ta wak den su mes kaso. E tabata sali kas for di mainta i yega te anochi, e yunan ta bai lès di pinta i asina masha poko tabata konosé otro den Tera Kòrá. Tabata manera biba “langs elkaar heen” pero ta e bida tabata asina. E bida tabata di kas, trabou i deporte. I p’esei awor ta envolví e hendenan di Tera Kòrá mes den e proyekto pa asina nan por tin kontakto ku otro den bario.
Grupo di Kòfi Morgen
I saliendo di beisbòl pa muchu mas aktividat, e tesorero Jacqueline a konta ku dia 8 di yanüari 2026 a kuminsá ku un grupo di Kòfi Morgen. Nan no ta yam’e klup di dama pasobra tin hende hòmber tambe envolví. For di dia ku nan a kuminsá ku e proyekto di DIDI Deeds, nan a pone pa hasi muchu mas den e kompleho. Ora Jacqueline a baha ku penshun na desèmber 2025 mesora nan a pone man na obra pa por hasi mas. Asina a lanta e klup di Kofi Morgen. Awor ta reuní kada 2 siman aunke e hendenan ke bin mas. E grupo di kòfi Morgen tin kasi 80 hende, kemen un grupo grandi. Pa mustra riba nan aktividatnan Jacqueline a bisa ku na yüli por ehèmpel a bai sera konosí ku konsulado chines kaminda a siña tur kos ku tin di aber ku te. Tin vários di e hende den e grupo ta den otro grupo tambe. I p’esei nan ta purba ta diferente. Hasi charla, zumba i bishitá Sandals. Ta laga e hendenan mes skohe kiko nan ke i nan di e organisashon ta purba kumpli. Ta e mesun miembronan ku e konosementu nan ta usa pa pasa esaki over. Manera grupo di baile i karaoke pa henter bario. Kada 3 luna ta evaluá pa wak si ta riba e kaminda korekto. Nan ta plania hopi kos pero nan ke sa ku ta loke e hendenan gusta i asina den e reunion di evaluashon ta plania aktividatnan pa e siguiente 3 lunanan. I kada bes ta laga otro enkargá ku e organisashon. Ta e intenshon pa yega na un komishon pa guia e Kòfi Morgen. Jacqueline a bisa ku kada klup mester tin su mes karakter i nan ta purba pa e ta otro. Kosnan ku por ehèmpel nan a pasa na yòn, nan ta trese esei dilanti. Por ehèmpel kon atendé ku un telefòn. Dos banko komersial a bishitá nan i a yuda e hendenan ku e ‘Online Banking’. Nan ke eduká e hende grandi pa e mes tin kontròl riba su parti finansiero sin dependé di otro. Tambe ke pa instansianan di gobièrnu bin, pa e hendenan por sera konosí kuné.
Trabou di satisfakshon
E trabou den e fundashon ta hopi segun Jacqueline, pero ta duna satisfakshon. El a bisa ku aunke e no tabata sa nada di beisbòl ta dushi pa wak e muchanan su reakshon despues di kada partido òf treinen. Meskos ta dushi e reakshon di e grandinan despues di kada aktividat. E ta bal mas ku kualke sèn di mundu. I e trabou akí ta un trabou boluntario. Sheritsa a bisa ku e ta traha hopi aña komo boluntario. Pero awendia ora bo papia di boluntario e hende ta ferwaktu algu. Nan ta kompensá te kaminda nan por. Tur hende ta keha kos ta bira karu i nan tin hopi hóben i p’esei e aña aki a bin ku fakansi djòp pa e hóben mes por haña algu i yuda su mes. Ta e hóbennan di bario mes ta yuda den tur kos den e fundashon. E hóben ta visibel i ta siña e hóben for di yòn pa traha. Pero banda di e hóben di bario tin tambe instansianan di enseñansa manera ICUC ku ta hasi trabou boluntario pa proyektonan. Tambe ta haña yudansa di boluntario di empresanan manera di MCB. Di parti di MCB e koleganan di IT ta yuda ku smak. Tambe tin di Orco i tabatin di Banco di Caribe ku a duna un man. Esei nan ta purba sigui kuné tur aña i nan ta habrí pa otro instansianan ku tin boluntario òf tin hóbennan ku mester gana nan oranan. E intenshon ta pa traha un Database pa ora e hóben kaba i si nan tin tempu nan por sigui bin. Ekonomia di Kòrsou ta drai hopi pa boluntario. Nan no ta haña salario pero tin bia un kompensashon. I for di e punto di bista ei nan ta traha ku boluntarionan for di dia nan a kuminsá. E resultado di e desaroyo di e hende, for di mucha te hende grandi ta unu hopi satisfaktorio.
Muraya pintá pa hóbennan
Otro proyekto di Didi Deeds ta pinta muraya. E muraya grandi parti paden tin mat pa protehá e muchanan ora di wega i parti pafó tabata Sheritsa su soño pa e por pinta esei. Su yunan ta gusta arte i e tabata ke pa e parke tin hopi kos rekonosibel. Por ehèmpel, ora a koba pa traha e muraya, a haña hopi piedra kòrá i a usa nan pa asina tin algu ku ta asosiá ku e bario. Semper Sheritsa a bisa pa no mishi ku e muraya pafó pasobra e ke un proyekto pa pinta e muraya ei. I awor e soño ta bai bira realidat. Ya nan tin e promé spònser. Ora nan aserká instansianan pa haña spònser, semper ta invitá pa bin e parke pa mustra kiko nan ta hasi i kiko nan ke. I den e kuadro aki nan a haña e promé 10 mil florin pa e muraya. Ta bai kuminsá na final di e torneo aktual ku algu riba e muraya. I ta muchanan di pabou lo ta envolví den e proyekto aki. Segun Sheritsa, e muchanan di pabou tambe mester sinti nan envolví. Tin hopi artista hóben pabou i ora e mucha pinta riba e muraya ta algu permanente i e ta sintié asosiá ku e parke. I dimes su firma ta keda eiriba pa aña largu. Lo bai pinta e muraya den 4 tema. E tema di Blue Wave mester bin riba dje, tambe tema di kultura i deporte. Intenshon ta pa yega na 50 mucha i pa kada tema lo repartí esaki. Sheritsa a splika ku nan lo ke pa e proyekto kaba pa desèmber. Sherista a bisa ku nan ke pa e mucha wak ku tin futuro den arte i no den beisbòl so. I e ta wak serka su mes yunan kaminda no ta beisbòl so nan ta hunga pero tambe nan ta den sakamentu di potrèt, pintamentu, ‘story telling’ i hopi mas.
Tin mas kos ku deporte so
Aña pasá e fundashon tabatin un proyekto di hóbennan ku tabata bin huntu tur luna i a traha nan ‘vision board’ di kiko nan ke bira. Ta diferente profeshon a bin dilanti i kada un e organisashon a buska un persona, por ehèmpel si ta dòkter, laga un dòkter bin duna splikashon na e hóbennan. Esaki pasobra tin bia e hóben ta bisa kiko e ke bira, pero e no sa kiko e kos ta presis. A bin ku un ‘ranger’ di parke Kristòf por ehèmpel. Na final a hasi un ‘teambuilding’, kon plania, traha ku sèn i purba hasi e kosnan mas profundo posibel. I a klousurá ku trahamentu di pasaboka pa nan ta kreativo. I asina nan a mustra e hóben ku tin mas kos ku deporte so. “Bo no sa kiko ta biba den un mucha, si bo no papia kuné”, Sheritsa a enfatisá. Mester saka e mucha for di su zona konfortabel i lo bo konosé un otro mucha. Hopi kos nos no por hasi pero mare por a hasi mas pa asina mira kuantu oportunidat por krea pa nan. “Nos ta keda pensa kon pa yuda nos komunidat i esei ta henter e esensia ku nos ta besig kuné. Mi tin kasi 30 aña den Tera Kòrá. Didi ta hunga bala i mi por a bai biba den Janthiel, pero mi ta gusta naturalesa i mi gusta ‘hike’. I p’esei m’a keda den Tera Kòrá pasobra nos ta duna, pero ami a risibí hopi. Mi ta agradesido. Ora nos tabata konstruí e vèlt, un persona tabata traha sòpi i trese pa e trahadónan. E hendenan di bario tabata asina kontentu i nan a ekspresá esei” Sheritsa a bisa.
