Angelle Scharbaai; Fundashon Ambulans Deseo Kòrsou
Un deseo ku pa nos kisas ta algu masha simpel i ku nos ta hasi diariamente, pa otro por ta su último deseo. Fundashon Ambulans Deseo Kòrsou ku e aña aki ta kumpli nan di 5 aña ta trata na kumpli mas tantu posibel ku e deseo di e persona ku nos ta yama terminal. Angelle Scharbaai tabata na fundeshi di lantamentu di FADK i awor e ta presidente. I el a konta djasabra di nan trabounan i kon nan ta hasi esaki. I el a pone énfasis ku aki ta trata di un tim i no di dje so. Ta huntu nan ta hasié.
Konsepto di Ulanda a bira mundial
Angelle a konta ku e idea di lanta e fundashon a yega serka dje den trabou, kaminda e tabata traha ku personanan di Koninklijke Marashaussee i un di nan tabata boluntario di Ambulance Wens Nederland. E konsepto aki a lanta na Ulanda i awor el a bira konosí mundialmente. E persona aki a aserká Angelle ku e ta sinti falta di e trabou aki na Kòrsou i el a konta Angelle kiko e trabou ta nifiká i e satisfakshon ku esaki tabata trese p’e. Despues di a skuch’e i sabiendo ku su tata a fayesé ku kanser i tempu el a haña kanser el a bai kama i Angelle no por a transporte mas, el a pensa ku si e konsepto ei tabatei e lo a hasi uso di dje. Su mayornan ya no tei mas pero Angelle a haña tabata un bon idea pa purba bin ku e konsepto na Kòrsou tambe i a logr’e. E nòmber no tin nada di aber ku servisio di ambulans na Kòrsou. E nòmber a sali for di Ulanda i nan a disidí di tradusié pa e keda ku su úniko ku e ta.
E último deseo
Fundashon Ambulans Deseo Kòrsou ta un fundashon ku ta kumpli ku e deseo di un persona manera nan ta yam’e terminal. Un persona ku ta den estado ku no por hasi masha mas i ta na kama òf ta kana difísil. Nan ta hasié den estrecho kooperashon ku Catharina’s Care pa e parti di transportá. Nan ta wak kiko e pashènt ta deseá di hasi, ta puntra dòkter i wak tur kos i si ta OK ta sòru pa tin transporte, un enfermero sertifiká i ta bai buska e pashènt i ta hib’e kaminda ku e ke bai kaminda ta posibel pa asina kumpli kuné.
Deseo simpel pa nos pero grandi pa otro
E deseonan segun splikashon di Angelle ta masha simpel. Hopi bes ora tende último deseo, kisas hende ta pensa ku e pashènt ke bai Walt Disney òf algu asina pero den e kaso aki ta otro. Miéntras tantu ya nan a kumpli ku 55 deseo i por a ripará ku e kos ta masha simpel. Tin bia e pashènt ta den hospital òf Hospice, e pashènt tin kisas lunanan sin bai kas. E ta kòrda ku e promé deseo ku nan a haña tabata 12 di desèmber 2021 e persona tabatin 5 luna den Hospice i e kier a bai kas pa wak su prikichi, kachó i pushi i esei e fundashon a hasi. Nan a bai kas kuné, pone sinta bou di palu, tur bisiña a bin…..tabata un momentu hopi emoshonal. Angelle a bisa ku el a keda ku kontakto ku e yu te awe. Despues e persona kier a bishitá un amiga i a bai kuné pa e wak e ñetu. E persona kier a bai Sambil pero e kurpa tabata kansá. A bai kome kuné i hib’e bèk. E echo ku a kumpli ku e hende su deseo a yena emoshon. Ta algu ku bo no por imaginá. Tin bia deseo ta pa bai keiru Bándabou òf bai mira solo baha. Hopi bia bai landa ku ta hopi popular serka nan. Tin biaha e hende tin kateter òf un stoma òf zürstòf i ta kere ku e no por bai landa. Pero e tim di FADK ku ta traha tambe ku Alvaro Calvenhoven ku tin e rolstulnan di drenta awa. I huntu ku Astrid i un enfermero ta karga ku e pashènt pa e por drenta laman. Tin bia si e kurpa ta wanta ta sake di rolstul i laga e hende landa, sin bia e hende ta Sali for di awa i bai tera kabes spanta nan i ta hopi emoshonante pa mira i eksperensia. E emoshon di sinti e awa bek ta masha importante. Bishita Seaquarium i tuma sunchi serka dòlfein tambe ta deseo.
Mira solo baha…tabata un deseo
Angelle, basta emoshoná a konta ku hopi bes nos no ta ni tuma tempu pa hala rosea i e hendenan aki a hasié konsiente di por ehèmpel bahada di solo. E solo ta baha mes kaminda pero tur bia esaki ta diferente. E pidimentu di deseo ei a hasié konsiente. E ta kòrda ku den dos di e deseonan pa mira solo baha, un di nan e persona a fayesé kaba i e otro su kurpa a bai atras pone ku nan no por a kumpli kuné. Den un di e kasonan Angelle mes a bai wak e bahada di solo, el a graba esaki i mand’e pa e famia. I esei tabata masha bunita. E ta hasi hende konsiente ku e kosnan chikitu ku abo por hasi tur dia i bo no ta hasi nan i ora e hende su último deseo ta pensa ku ta algu masha grandi, logá ta algu masha simpel.
Mester keda un alegria i no un lamento
Tur deseo por pidi pero e fundashon ta keda masha responsabel, segun e presidente. Na promé lugá mester wak e fondonan pasobra nan no por kubri algu grandi pero tambe e situashon ku e persona ta aden mester ta unu den trankilidat. Un persona un dia a pidi pa bai Bándabou pero dòkter no a haña esei responsabel. Ku esaki Angelle a bisa ku por pidi pa tur deseo ku ta seif, nan ta wak den direktiva si por kubri esaki, pero si haña voral di dòkter ku no por e ora ei no por kumpli. I ora kumpli ku e deseo semper tin un enfermero presente i si e mira ku e persona kisas a bira muchu kansá, mester para e deseo mesora. E mester keda momentu di alegria pa e persona i no algu ku ta lamentá despues. E fundashon por kumpli ku un deseo den 2 dia. E ta kòrda ku el a yega di haña deseo ku nan a kumpli kuné di un dia pa otro. Pero un biaha mas si tin di laga dòkter wak promé, esei si ta tuma su tempu. Nan lo preferá den wikènt pasobra ta un trabou boluntario. “Mi tim ta gewon amazing. Mi tim ta asina komprometé i mi ta super orguyoso ku nos ta pone pasa. Asina nos mira ku e por”, Angelle a splika.
Drei riba donashon
Hopi bia fundashonnan ta keda pegá ora yega na asuntunan finansiero. Den kaso di Fundashon Ambulans Deseo Kòrsou Angelle a konta nos ku awor aki nan ta besig purba organisá un rekoudashon di fondo. Nan ta drei kompleto riba donashon. Pa nan kumpli ku e deseo ta riba nan gastu i nan por bai serka instansianan pa kumpli pero instansianan tambe sa serka nan manera famia Salas ku tur aña ta yuda e fundashon. Pero tambe tin bia despues ku nan kumpli ku deseonan, nan ta haña sorpresa riba nan kuenta di banko ku famia ta pone algu. Nan ta purba pa e bai over di e hende i no ta pone preshon riba asuntu di sèn.
Un dia di alegria
Te ainda, den kasi 5 aña di eksistensia di e fundashon nan a kumpli ku 55 deseo. Angelle a bisa ku tin di e pashèntnan no tei mas pero algun tei si ainda. I teniendo na kuenta e situashonnan ku nan kumpli kuné, tabata interesante pa sa kon nan mes den e kaso aki Angelle mes ta dil ku e situashon. El a bisa nos ku e ta otro ku si tabata trata di famia i p’esei e no ta sintié komo un peso. Ora nan ta enfoká, nan ta hasié pa duna e hende un dia mas di alegria i p’esei nan no ke papia di e malesa i kon malu e ta. Nan no ta buska informashon pero ta e enfermero ta wak esei i nan ku ta sòru pa e parti di deseo nan no ke kòrda ku e ta malu pero dun’é e alegria. I ora bo mira e alegria ei ta nan satisfakshon. Nan ta keda positivo ku e persona te final i esei ta duna nan e forsa ku ora tuma despedida di e hende e ta hasi doló pero a yuda e hende i su famia pa un dia di alegria.Un di e kasonan ku si a impaktá nan tabata un señora di 32 aña ku tabata terminal i tin 2 yu menor. Esei tabata hopi duru ora a kaba ku e deseo. A bai ku nan wak dòlfein, a kumpra regalo pasobra tabata fin di aña i ora nan tres a kaba i a sali pafó, e dia ei tabata hopi emoshonal…nan tur a yora. A mira un señora yen di bida ku gana pa tei i su yunan chikí. E señora a wanta duru i despues di algun luna el a fayesé. Esei tabata e kaso di e hende mas hóben ku nan a haña.
Petishonnan ta konfiabel
Ora e petishonnan pa último deseo bin nan di e fundashon no ta bai wak si ta bèrdat, si e hende realmente ta muriendo òf zo pasobra di e kaminda ku e ta bin por ehèmpel di un Hospice òf hospital ya ta bisa tur kos kaba. I si e bin di kas mes hopi bia tin un enfermero di bario i si bai wak e situashon por mira kaba kiko esaki ta. Nan a yega di haña un kaso di un hòmber ku a yega di haña ataka i tabatin mas di 10 aña na kama. I ora el a kumpli 80 i piku famia a aserká nan pa kumpli ku e deseo di e tata. Nan a kumpli kuné pasobra e hende tabata na kama. Den un tipo di kaso asina tambe nan ta kumpli pasobra den e kaso aki por ehèmpel e famia no por a saké for di kama i el a kumpli aña tambe.
Amor, rèspèt, armonia i trankilidat
Durante di e entrevista ku Angelle e tabata sinta un un peluche ber riba su pia. El a konta nos ku e peluche ber aki yama Kees i e ta na maskota. Kees ta e símbolo di e fundashon. Na momentu ku nan bai un deseo, tur e wéspetnan ta haña unu. E ber aki ta duna e sentimentu di konfortabel pasobra por mira ku e pashènt ta pasa su sobra dianan ku e ber tené. E motibu ku e yama Kees pa honra esun ku a lanta e fundashon na Ulanda ku lamentablemente na edat di 50 aña el a haña ataka di kurason i fayesé. Klaas Damburg ta esun ku a bin ku a idea na Kòrsou i e nòmber ta bin tradusí di esun di Ulanda. E maskota aki ta usa mundialmente, unda ku e organisashon ta eksistí. E bernan aki nan ta haña grátis i Klaas ta sòru pa esaki, ounke e mes ta bèk na Ulanda i no ta den e fundashon na Kòrsou mas. E fundashon aki tin hopi amor, rèspèt i trankilidat. Nan tin un armonia ku tur kos ku nan mester ta yega. I esei ta loke ta hasi Angelle aun mas orguyoso. E direktiva aktualmente ta konsistí di 3 persona,Tahir Martina ku ta vise presidente i Ruud Hammers ku ta e tesorero. I banda di nan tin un grupo grandi di boluntario entre nan Catharina’s Care.
Sa kiko bo ke i bai p’e
Angelle Scharbaai tin yuda hende komo su prinsipio. E ta bin komo ruman chikí di un grupo di 7. El a lanta den hopi hende grandi i su mama semper a push’e pa e ta riba su mes. El a siña for di chikí pa e hasi tur kos, pa e siña i ta independiente. I p’esei semper el a sòru ku kaminda e por duna di su banda pa yuda un hende. E ta hasié. I komo hende muhé i den e luna di hende muhé aki Angelle ta wak su mes komo un hende ku a pusha hopi den bida. El a bai studia Ulanda i den su aña di ‘propedeuse’ el a bira mama i den su di tres aña el a bira mama pa di dos bia. El a studia ku su yunan i esei ta un reto grandi pasobra ku un mes diosa. Si el a sòru pa kaba pa duna su yunan loke e mester. Ora su mayornan a bira grandi i nan tabatin mester di kuido el a hasié i e ta kontentu di a hasi esei. El a bin Kòrsou bek na 2006 i su mama a fayesé na 2010 i su tata na 2014. Su yunan a haña chèns di konosé su mayornan. I p’esei e ta kontentu di a hasié pasobra si el a warda nunka su yunan lo a konosé su mayornan. Ora bo ta den e proseso bo no ta komprondé i tin ta husga bo pasobra el a bai studia i a sali na estado, pero ora e wak su mes, kon leu el a yega, awor ku su propio negoshi, su yunan ta studia na Ulanda i e tin asina tantu kos ku e ta kontentu kuné, e ta kontentu. Kada reto ku el a surpasá tabatin un motibu i esei awor ta un ehèmpel pa e por bisa otronan…djis un tiki mas. Hopi bia nos ta warda un hende enkurashá nos i bisa ku nos por hasié pero e no mester ta asina, pasobra e enkurashamentu ei nunka lo bo hañ’e. Sa kiko bo ke, prepará pe i bai pe, Angelle a bisa ku un bos firme.
E bida di hende muhé no ta fásil, pero ku disiplina por logra
Angelle no ta kere ku tin kos ku hende muhé no por logra. El a bisa ku hopi bia hende muhé su bida ta duru. Na Kòrsou tin enfoke ku hopi biaha tin mamanan ku nan so ta atendé ku nan yu. Esei no mester ta algu ku tin di wak fásil. Antes ku kos bai malu òf no bo ta haña e tata na kas i ta keda pusha. Pero e dinámika di bida awor aki ta otro. E ta pone ku bo mester tin un forsa hopi grandi ira skohe pa sali for di loke bo ke sali ei pa logr’e. I esei ta trese tin bia e pensamentu ku hende muhé no po tur kos pero e ta kere ku disiplina por logra.
Komuniká bon pa por komprondé bo mensahe
Pa un hende muhé desaroyá su mes Angelle ta kere ku nan mester dediká nan mes na nan desaroyo general. Lesa buki pa siña konosé filosofia di bida i komuniká. Nos ta sali for di un kultura ku por ta hopi dirèkt, bòt i ta trese kosnan dilanti hopi pisa, pero esei no ta yuda e kousa pasobra hende ta wak e manera ku ta trese algu dilanti i no ta skucha e mensahe su tras. E momentu ku siña komuniká i sòru pa komprondé e ambiente ku ta aden, prepará bo mes bon, esei ta bo Stepping Stone, segun Angelle. Komo hende muhé keda eduká bo mes i keda di focus.
Tin mas kos na kaminda
Angelle ta kontentu kaminda e ta awor aki. E ta den coaching pa empresanan, yuda den liderazgo, komunikashon, e tin FADK i e tin otro proyekto mas na kaminda. Nan ta besig ku algu pa duna atenshon na hóbennan ku a “drop out” i pa nan haña fishi. Nan ta besig ku e proyekto aki i e no ke papia ainda masha di dje. I tin mas kos na kaminda. Angelle a bisa ku e tin energia pasobra loke e ta hasiendo ta su pashon.
Kontakto; www.fadk.info, (WhatsApp) 599 9 6636116
