QUITO, AP.- Presidente Lenin Moreno a informá ku a krea kondishonnan pa Julian Assange sali segun e kier di e embahada ekuatoriano na London.
E fundadó di WikiLeaks a refugiá den e embahada ekuatoriano na London den yüni 2012 pa evadí un òrdu di ekstradishon pa Suesia, kaminda e ta wòrdu akusá pa delitonan seksual.
E mandatario a bisa den un entrevista ku a realisá kombersashonnan ku e gobièrnu britániko pa pidi “e pais pa respetá derechi humano, i e bida di Assange, garantisá su bisa, garantisá ku e no ta wòrdu ekstraditá pa ningun pais kaminda su bida ta na peliger òf kaminda e ta wòrdu kondená na morto”.
El a agregá ku “nos a wòrdu informá ku e konstitushon di Gran Bretaña ta impedí ku un persona ta wòrdu ekstraditá na un sitio kaminda su bida ta na peliger”.
Tantu Assange komo su abogadonan ta teme ku e por wòrdu ekstraditá pa Merka. Akinan el a revelá sekretonan militar i di Estado i kaminda Hustisia kier pa e paga pa e akshonnan aki.
Suesia a retirá e kargonan di intimidashon seksual kontra Assange, pero hustisia britániko a ninga su pedido di libertat debí ku huesnan a konsiderá ku e no a kumpli ku e kondishonnan di libertat bou di fiansa.
Ecuador a konsedé Assange siudadania ekuatoriano den desèmber komo parti di un esfuerso pa hasié miembro di su ekipo diplomátiko. Esaki ta garantisá sierto derechi manera inmunidat legal. Sinembargo, Gran Bretaña a rechasá e pedido di entreg’é status diplomátiko.
