QUITO, AP.- Presidente Lenin Moreno, kompañá pa vários minister a akudí na Asamblea djaweps pa promové un lei ku por prevení i eradiká violensia di género kontra muhénan na Ecuador.
E proposishon aki, krea i impulsa desde vários aña pa organisashonnan di muhé, a wòrdu adoptá pa e gobièrnu aki, den poder desde mei, i ta bai wòrdu analisá pa 137 asambleista, mayoria di kual ta korespondé na e partido di gobièrnu, Aliansa Pais.
E inisiativa “ta pone énfasis riba e informashon, prevenshon i atenshon, inkluyendo reparashon integral i spesialmente di derecho di muhénan víktima di violensia. Ademas esaki ta independiente di nan sekso biológiko, orientashon seksual i identidat di género”, segun indikashon di e agensia ofisial Andes.
Promé ku su aprobashon, e mester pasa debatenan legislativo, e último di nan ofresé pa presidente di Asamblea, Jose Serrano dia 24 di novèmber. Esaki lo koinsidí ku e dia di eliminashon di violensia kontra muhé.
Durante su kampaña, Moreno a impulsa proyektonan pa sektornan mas vulnerabel, manera ansiano, mucha i muhénan.
Despues di entrega e teksto, e mandatario a indiká na legisladornan ku e proyekto “ta un paso importante pa garantisá derechi di muhénan pa un bida liber di violensia”.
E sifra di asesinato di muhénan, dor di violensia di género a oumentá den añanan resien na Ecuador: na 2014 esaki tabata 103, na 2015 esaki a yega 105 i na 2016, 136. Den paisnan bisiña manera Colombia i Perú, e asesinatonan di muhé pa e mesun kousa a yega 122 i 95 respektivamente den 2016 segun sifranan ofisial.
