QUITO, AP.- Ecuador a anunsiá djaluna ku e lo eksigí pa venezolanonan ku kier drenta e pais presentá nan registro hudisial, despues ku un siudadano venezolano a asesiná un hóben ekuatoriano na estado fin di siman.
E echonan a provoká ku siudadanonan di Ibarra, a start ku un yagmentu di e venezolanonan. E siudadanonan a sakeá refugionan ku violensia. E situashon no por a wòrdu kontrolá mesora. Mainta patruyanan militar a logra kontené e pueblo.
E venezolano a mantené e ekuatoriano di 22 aña durante un ora i mei komo rehen riba kaya. E dama a wòrdu asesiná dilanti di polisnan i sentenar di persona kurioso. Esaki a kosta destitushon di e gobernador.
E echo a okashoná ku e visepresidente Otto Sonneholzner, a anunsiá e rekisito migratorio nobo pa venezolanonan. E medida a wòrdu provoká pa trese mas seguridat entre e pueblo.
Míles di venezolano a hui durante último añanan pa Ecuador debí na e situashon ekonómiko i sosial malu ku ta reina den e pais. Otro migrantenan a kontinuá nan biahe pa Perú, Chile i asta pa destinonan mas leu manera Argentina i Brasil.
Organisashon di Nashon Uní a kalkulá ku mas di 2.3 mion venezolano a sali di e pais desde 2015, meimei di skarsedat di kuminda, medisina i sin posibilidat di trabou.
