Presidente ekuatoriano Daniel Noboa, kende ta hibando un pelea fuerte kontra di gruponan kriminal den e pais.
QUITO, Ecuador (AFP).- Outoridatnan di Ecuador a pone man riba 26 persona vinkulá ku un grupo disidente di FARC i a konfiská un sentenar di propiedat balorá na un sifra rèkert di 300 mion dollar, segun e presidente dje pais Daniel Noboa. E rebeldenan dje grupo Comandos de la Frontera ta keda señalá na Ecuador pa ta esun responsabel pa un atake ku a mata 11 sòldá dje pais den luna di mei durante un operashon ofisial kontra di mineria ilegal den e region amazoniko.
Comando de la Frontera ta formá pa disidentenan di e eks-FARC, ku a apartá nan mes for di diálogo di pas den 2016, i ku ta negoshá un akuerdo ku e gobièrnu dje mandatario kolombiano Gustavo Pedro, pero sin logra avanse.
“Awe nos a propiná e sla di mas fuerte na e ekonomia kriminal den historia di Ecuador: “mas ku US$300 mion na propiedat konfiská for di nan”, segun e presidente a selebrá riba ret sosial X.
E minister di Interior, John Reimberg, a bisa na prensa ku 26 persona a keda kapturá durante di 68 razia den nuebe provinsia, inkluso dos region di Amazona na frontera ku Colombia i Perú, dos ku salida pa osean Pasífiko i den Pichincha, ku ta na e kapital Quito. Ademas, a pone beslag riba sinku kompania via di kua “a laba mas ku 70 mion dollar”, segun Reimberg.
Alrededor di 600 agente uniformá a tuma parti na e operashon. Riba videonan divulgá pa polis, por mira desena di agentenan di forsanan spesial, ku kara kubri i armanan outomátiko, eskoltando vários sospechoso di bui den kasnan luhoso. E organisashon ta liderá pa Roberto Alvarez, alias Gerente, “miembro aktivo i supuesto lider” dje grupo gueriero, segun Reimberg.
