QUITO, ECUADOR, AP.- Ecuador a ekspresá e preokupashon pa krísis migratorio ku ta afektá míles di kubano den vários pais den region i a indiká ku polítikonan migratorio di Merka ta responsabel pa esaki, kende ta stimulá e fluho kubano pa e pais.
Den un komunikado, kansier ekuatoriano a bisa ku a “ekspresá preokupashon pa e krísis migratorio ku ta afektá, míles di siudadano kubano den último lunanan den situashon di mobilidat den vários pais den e region”.
” Por identifiká e faktornan ku ta generá i alimentá e krísis aki, partikularmente e polítika migratorio di Merka, atraves di “Lei di Ahuste Kubano” di 1966 i revishon ehekutivo di 1995, konosí komo “pia seku, pia muhá”, ku ta otorgá dokumentonan legal di migrashon na kubanonan ku yega e pais.
E disposishon ta konstituí un estímulo permanente “na e fluho insesante i riesgoso di kubanonan ku ta transitá den nos pais, ku e propósito pa yega na kualkier di e puntonan na frontera merikano”.
Kansier kubano a publiká un pronunsiamentu similar e siman aki.
Den e dokumento, Ecuador a pidi tur esnan involukrá den e situashon pa adoptá medidanan konhunto den e situashon aki.
E siman aki, Ecuador a deportá 122 kubano ku desde luna di yüni ta kedando den e kapital ekuatoriano den protestanan riba kaya eksigiendo visanan humanitario na México i e yudansa pa trasladá nan pa e pais. E deportashon a tuma lugá apesar ku e gobièrnu ekuatoriano ta proklamá siudadania universal i sirkulashon liber di persona.
