Trahadónan di reskate ta saka restunan mortal di un dje víktimanan dje edifisio ku den oranan di mardugá a basha den otro den e siudat filipino Angeles City.
ANGELES CITY, Filipinas (AFP).- Ekiponan di reskate filipino te ku ayera nochi tabata buska komo binti persona desaparesé pa un bashamentu den otro mortal, di un edifisio den parti nort dje pais. Tabata tende gritunan di doló di esnan ku a keda pegá, segun outoridatnan .
Outoridatnan den siudat di Angeles, na 80 km nort dje kapital, a informá ku den kareda di 3or di mardugá e informashon a drenta ku un edifisio di nuebe piso, ku ainda ta den konstrukshon, a basha abou. Komo 14 ora despues dje suseso ainda tabata buska bastante hende. Djis pegá un hotèl tambe a sufri daño ku a kosta bida di un turista di 65 aña.
Segun e hefe interino di kuerpo di bombero filipino, Rico Kwan Tiu, e wéspet di e hotèl a komuniká via telefòn ku ekiponan di reskate na momento ku e tabata pegá bou di un muraya. “Pa desgrasia, ora ku e reskate a yega ya e no tabata duna señalnan di bida. Nos lo sigui ku e reskate pa por lokalisá e otro hendenan”, el a bisa.
Segun alkalde dje siudat, na momento ku e edifisio a basha den otro sigur e gran mayoria dje hendenan tabata na soño. Te ku ayera lat ainda no tabata sa e kousa dje aksidente.
Outoridatnan a manda hopi ekipo di material pisá pa e sitio, konsiderando e kantidat grandi di murayanan enorme bou di kua por a skucha gritunan di ousilio.
