WILLEMSTAD.- Ayera mainta tabatin un kaso hopi tristu na un skol di fundeshi kaminda un hobensita di 11 aña a fayesé. El a bira malu na skol i a yama ambulans urgente pero ya no por a hasi nada mas p’e. E kriatura tabata den su siman di EFO Toets.
Esaki a kondusí ku a posponé EFO Toets pa e skol kompletu.
Ministerio di Enseñansa, Siensia, Kultura i Deporte (ESKD) den estrecho koperashon ku direktiva di Fundashon Skol Humanista na Papiamentu, den konsulta ku Slachtofferhulp i komishon enkargá ku ehekushon di e prueba EFO, a posponé Pruebanan final di Enseñansa di Fundeshi (EFO) na Kolegio Erasmo riba e dianan 13 i 14 mei 2025.
Esaki ta un eksepshon a konsekuensia di e insidente ku a tuma lugá na skol kaminda un alumno durante di e pruebanan ayera mainta a bira malu i a fayesé mas lat na CMC. E situashon a impaktá henter e skol. Minister ta informá ku a tuma e desishon akí komo ku kada alumno ku ta partisipá na EFO mester ta den balansa emoshonal pa nan por traha na pruebanan di e mihó manera.
Ministerio di ESKD ta hasi un yamada a la bes na tur mayor i tutor pa keda trankil, sigui kuida i tuma bon nota di e alumnonan su salú, tantu en general komo durante di e periodo di pruebanan.
Relashoná ku e situashon aki, e kordinadó general temporal di Fundashon Skol Humanista na Papiamentu a notifiká mayornan di loke a pasa. T’asina ku for di ora e hobensita a yega skol, e tabata malu, pues promé di a traha EFO. A notifiká e alumno su mayornan i tambe a yama ambulans ku a transporte pa CMC, pero lamentablemente el a fayesé.
Mirando e situashon aki, gerensia di skol a anunsiá ku awe djárason 14 di mei no tin skol pa alumnonan di Kolegio Erasmo te djaweps 15 mei. Tambe lo tin profeshonalnan presente pa guia e alumnonan. Alabes ta ofresé sosten di profeshonal den e momentunan aki.

LAGA UN KOMENTARIO

Please enter your comment!
Please enter your name here