E barku di guera norteamerikano USS Gravely pará na Port of Spain ayera. E barku ta na e isla karibense pa algun ehersisio netamente dilanti kosta di Venezuela.
CARACAS (AFP).- Gobièrnu di presidente Nicolas Maduro ayera a denunsiá un “provokashon militar” intenshonal na momento ku Merka i Trinidad & Tobago a start ku algun ehersisio militar dilanti di su kosnan. Caracas a reakshoná riba yegada ayera di un barku di guera merikano USS Gravely na Trinidad & Tobago, un archipiélago chikitu dilanti di Venezuela, miéntras ku e presidente norteamerikano Donald Trump ta intensifiká su preshon riba e presidente venezolano Nicolas Maduro.
“Venezuela ta denunsiá provokashon militar di Trinidad & Tobago den kordinashon ku CIA pa provoká un guera den Karibe”, segun un komunikado dje vise presidente venezolano, Delcy Rodriguez. E gobièrnu ademas a anunsiá kaptura di “un grupo di mersenario” vinkulá ku e agensia di inteligensia norteamerikano (CIA).
E barku di guera merikano tabata visibel ayera mainta dilanti kosta di Port of Spain, segun periodistanan di AFP a konstatá den e kapital trinidense. Caracas a indiká ku “no ta trata di ehersisionan defensivo: ta trata di un operashon kolonial di agreshon ku ta buska pa konbertí Karibe den un espasio pa e violensia letal i e dominio imperial norteamerikano”.
Gobièrnu di Maduro a akusá e promé minister di T&T, Kamla Persad-Bissessar, di a “renunsiá e soberania di Trinidad and Tobago” pa aliniá su mes ku Merka. Esaki ta konbertí “su teritorio den tereno di guera di Merka pa e guera ku hinter Karibe kontra di Venezuela, kontra di Colombia i kontra di Suramérika”, segun e komunikado.
