DAMASCO, SIRIA, AP.- Ehérsito di Siria a deklará un tregua unilateral di tres dia den e pais kompleto. E anunsio ta tuma lugá na komienso di e selebrashon musulman Eid al-Fitr, ku ta tuma lugá na final di e luna sagrado di Ramadan.
E tregua temporal a drenta na vigor djárason i ta ekstendé pa djabièrnè 12’or mardugá. Asina medionan estatal sirio a splika.
Si esaki keda respetá, e ta bira e promé tregua desde e “paro di hostilidat” ouspisiá pa Merka i Rusia, ku a drenta na vigor dia 27 di febrüari último. E akuerdo ei, ku ta ekskluí gruponan insurgente manera Estado Islámiko a redusí violensia den e pais drástikamente durante vários siman. Finalmente esaki a frakasá despues di un ofensivo na Damasco na nort. No ta evidente si e tregua nobo ta laga gruponan konsiderá komo terorista pa gobièrnu afó. Gruponan di oposishon ku ta lucha kontra gobièrnu di presidente Bashar Assad no a duna komentario riba e anunsio. E sekretario di Estado di Merka, John Kerry, inmediatamente a elogiá e deklarashon, afirmando ku a kuminsá konsultanan ku Rusia i otro paisnan pa prolongá e tregua. Kerry a hasi un yamada na tur e partinan di konflikto honrando e tregua i duna algu di alivio na e pais asotá pe a dramamentu di sanger aki.
