WASHINGON, USA (AFP).- E ekipo di presidente eligí di Merka, Donald Trump, lo kuminsá traha ku e gobièrnu di Joe Biden pa yega na un “akuerdo” entre Ukrania i Rusia, segun Mike Walts, futuro asesor di seguridat di White House.
For di despues di elekshon di Trump dia 5 di novèmber último, europeonan ta teme ku Merka lo hasi manera nan no ta komprondé e konflikto òf inkluso lo preshoná pa yega na un akuerdo no faborabel pa Kiev.
E presidente eligí, kende lo drenta White House dia 20 di yanüari, ya a skohe gran parti di su gabinete, ku ainda mester haña aprobashon di Senado.
“Presidente Trump ta bon kla riba e nesesidat di pone fin na e konflikto aki. “E loke nos mester diskutí ta ken ta bai sinta na mesa, si tin un akuerdo, un suspenshon dje guera, kon pa logra haña tur dos parti sinta na mesa i kiko lo ta e punto pa un akuerdo”, segun Waltz – nominá pe trabou stratégiko komo asesor di seguridat nashonal pa White House- a deklará na Fox News.
“Riba esaki lo traha ku e aktual gobièrnu te yanüari pa despues nos sigui”, segun el a deklará na e televishon faborito dje konservadornan.
“Pa nos oponentenan ku ta pensa ku esaki ta un oportunidat pa mira un gobièrnu kontra dje otro, nan ta robes”, el a bisa, i na mes momento a insistí den e “preokupashon” dje ekipo di Trump pa e echo ku e konflikto a eskalá.
E sirkulo íntimo dje presidente eligí a kritiká di forma severo e desishon di Biden pa permití ku Ukrania ta ataká teritorio ruso ku misilnan di alkanse largu ku ta di fabrikashon norteamerikano.
Durante di su kampaña, Trump a mustra su mes séptiko relashonal ku e míles di mion ku atministrashon di Biden a proporshoná na Ukrania for di despues dje invashon ruso den 2022.
E republikano na vários okashon a bisa ku hopi lihé lo e pone fin na e guera, sin spesifiká e manera pa hasi esei.
Pa loke ta Medio Oriente, su futuro asesor di seguridat nashonal tambe a boga pa un “akuerdo” ku “realmente ta trese stabilidat”.
