TEHRAN, AP.- Ekiponan di búskeda i reskate a haña e lugá na sùit di Iran kaminda e avion ku 65 persona na bordo a kai. Tur hende a muri, segun indikashon di e kanal di televishon Press TV.
E ATR-72, un avion bimotor, empleá pa Aseman Airlines pa trayektonan regional di distansia kòrtiku, a kai djadumingu den un zona ku hopi nubia i a dal kontra seru Dena, na sùit di Iran.
Ekiponan di reskate a yega na e sitio djaluna mainta, segun e kanal di televishon. E kadena a bisa ku tempu a mehorá i a emití imágennan di un helikòpter hasiendo su tareanan.
Tur esnan ku tabata biaha den e buelo EP3704 a fayesé, inkluyendo seis tripulante, segun Aseman Airlines.
Ta trata di un desaster aéreo nobo mortal na Iran, despues di vários aña di sanshon oksidental pa su programa nuklear ku a impedí e pais di kumpra piesanan nobo pa nan avionnan.
E emisor a transmití imágennan di un helikòpter bulando riba un zona i ambulans i vehíkulonan di reskate yegando na e sitio di e sieniestro. E lugá tin 3.500 meter di altura segun informenan.