NEW YORK, MERKA, AFP.- Michael Cohen, un eks abogado di Donald Trump kende a wòrdu enkarselá pa hasi pagonan ilegal na nòmber di e mandatario merikano i liberá dor di Coronavirus, a bai prizòn bèk despues di rechasá e kondishonnan di su ‘huisarest’ segun indikashon di e departamento di prizòn.
Cohen, kende tin 53 aña a wòrdu sentensiá na tres aña di prizòn despues ku el a atmití di a hasi algun pago ilegal na nòmber di Trump. Ademas el a kometé froude di impuesto i gaña dilanti di Kongreso.
El a wòrdu enkarselá aña pasá den luna di mei den un prizòn federal na nortwèst di New York, kaminda e mester keda te ku 2021.
Pero den mart su abogadonan a pidi pa e wòrdu liberá dor di e riesgo haltu di propagashon di Corona vírus den prizòn, i riba 21 di mei el a sali pa kuminsá ku su aresto na kas.
Cohen tabata man drechi di Trump durante vários aña, pero el a konfesá algun delito ku a impliká Trump den korte i dilanti di Kongreso.
Cohen a deklará kulpabel pa vários krímen na aña 2018 i a forma parti di Trump Organization durante un dékada.
