SUZANO, BRASIL, AP.- Dos hòmber ku kapuchon i arma ku pistol, kuchú i hacha a ataká un skol na sùit di Brasil, kaminda nan a mata sinku studiante i dos adulto. Despues di esaki nan a kometé suisidio, segun informashon di outoridat.
E hòmbernan, kende a wòrdu identifiká komo eks alumnonan di e skol na São Paulo a tira i mata doño di un negoshi di outo segunda mano den serkania, promé ku nan a realisá e atake kontra e skol, segun informashon di outoridat.
Ademas di e sinku studiantenan, tabatin un maestro i un funshonario di e institushon entre e víktimanan, segun señalashon di Joao Camilo Pires de Campos, e sekretario di Seguridat Públiko di estado. Nuebe persona mas a resultá heridá durante e atake i ta interná den hospital, asina el a agregá.
“E dia aki ta esun di mas tristu den mi bida”, asina de Capos a komentá dilanti reporteronan pafó di e skol.
Outoridat a identifiká e agresornan komo Guilherme Taucci Monteiro, di 17 aña i Henrique de Castro di 25 aña.
E mama di Monteiro a ofresé un posibel kontesta. Skondiendo su kara dilanti di kámara di televishon Band News, el a komentá ku su yu a sufri abusu na e skol.
“Debí na bullying, el a stòp di bai skol”, asina e mama a bisa.
El a señalá di a keda babuká pa mira partisipashon di su yu den e atake i ku el a haña sa di e insidente atraves di televishon, meskos ku tur otro hende.