WILLEMSTAD.- Hues Van Lieshout  ayera a bai di akuerdo ku fiskal pa posponé libertat di e akusado Edion Roberto (21) i mand’ébèk prizòn. Roberto ta keda akusá pa intento di asesinato  riba  su víktima  C.M. dia 7 yanüari 2020, último.

Segun e akusashon, Roberto a tira dirigí riba e vehíkulo ku e víktima tabata sintá aden ora e tabata pasando.

Ayera Roberto ku tabata den libertat pendiente pa su kaso keda tratá, a presentá dilanti hues pa responsabilisá su mes pa su  akto.

E víktima tambe tabata den sala pa sigui tratamentu di e kaso.

Roberto a ninga di a tira riba e outo. “Mi no sa nada, nada, mi tabata huntu ku mi primu den Saliña 8 or di anochi e dia ei, segun e akusado.

Hues Van Lieshout ku a hasi e kaso, a revelá ku riba e dia ei a drenta un “melding” na polis di un tiroteo ku tabata tumando lugá den área di Mahuma. E persona ku a yama duna e informashon a bisa: Manda polis mes ora, mi ruman hòmber tin problema ku un otro hòmber. E sentralista na su turno a puntra si e hòmbernan ta  tirando riba otro, kual e informante a bisa si, mi ruman hòmber a tira riba e otro gai. Polis a laga e akusado skucha e tape ku a keda grabá i a rekonosé e stèm komo esun di su ruman.

E víktima ku a bai hasi denunsia na polis, a deklará  ku  Alberto a tira riba dje ora e tabata pasando dilanti su kas den un vehíkulo. Segun e víktima, promé ku esei, e tabata pará na un chines kolo ros, ora direpente un Kia Sportage koló blanku a lora para serka dje.

Ora el a wak bon, el a rekonosé e dama ku tabata tras di stür komo amiga di Alberto.  E dama a puntr’é ku e tin problema ku Edion.

Segun deklarashon di e víktima mas aleu, direpente Alberto a kore yega ku su tata na e chines.

Alberto a grita e muhé  pa bin busk’e i a pasa dal den e víktima su pia. E víktima a bisa di a keda trankil i no a reakshoná. Despues el a  kore bai ku un amigu  i ora a bin bek, el a pasa mira Roberto  sintá riba kashi  koriente. Segun e víktima  manera Alberto a mir’é, el a saka un arma i lòs bala riba e vehíkulo.

Roberto a keda insistí ku loke el víktima ta papia no ta bèrdat. El a bisa ku nan konosé otro fo’i chikí i ta biba den mesun bario.

Segun Roberto, nada di loke e víktima a papia no ta kuadra ku bèrdat. E dia ei el a sali kaya ku su primu i keda  kasi henter anochi riba kaya. E no sa di tiramentu, ta tende el a tende.

Pa loke ta trata e deklarashon di e ruman hòmber ora ku el a yama polis, e akusado a bisa ku su ruman a kai den shòk i papia kos robes.

Hues a sigui konta ku e ruman hòmber despues  a kambia deklarashon i bisa polis ku e tabata drumi durante tiroteo i no sa mas ken a tira.

El a bisa dor ku e sa ku su ruman tabatin problema ku otro hende, el a spanta i bisa ku ta su ruman a tira.

Hues a relatá ayera ku doño di un kompania di kran a bisa ku den pasado e tabatin problema ku e akusado ku a  menas’é ku arma, pero e no a  hasi denunsia i ta bai pens’é.

E víktima a deklará ku e siguiente dia e akusado a bin ku su tata serka dje i a pidié sòri. El a ofresé 100 florin pa keda ketu, pero despues el a bolbe busk’e problema.  Segun e víktima e problema entre e i e akusado a kuminsá 3 aña pasá  durante un fiesta ku e víktima a organisá. El a invitá algun dama di Campo.

Un di e damanan ku tabatin relashon ku e víktima, a yam’é bis’é ku e akusado ta busk’épa bai kama kuné. Momento ku e víktima a reklam’é e akusado a bira furioso i a surgi mal kontentu den nan amistat.

E akusado a ninga redondamente. El a bisa ku el a bai e fiesta bèrdat, pero no tabatin problema pa muhé. Segun e akusado e no tin problema ku e víktima. Segun e rapòrt di Reclassering, e akusado tabata bringa hopi na skol dia e tabata chikí i  mester a bai sikólogo.

Fiskal a bisa ku no por proba e intento di asesinato, pero si ku e akusado a tira riba e víktima.

Tambe por proba e akusashon di menasa i poseshon di arma. Mirando esaki fiskal a pidi  30 luna  kitando e aresto preventivo i pa manda e akusado bèk prizòn mes ora. Hues den su desishon a bai kompletamente di akuerdo ku fiskal. Despues di e kaso, e akusado a keda detené i hibá bèk prizòn.

 

LAGA UN KOMENTARIO

Please enter your comment!
Please enter your name here