NEW YORK, MERKA, AFP.- E britániko Ghislaine Maxwell a deklará no kulpabel pa seis delito vinkulá ku tráfiko seksual di hobensitanan pa satisfasé deseo seksual di su eks pareha, e finansiadó merikano defuntu Jeffrey Epstein.
Epstein a wòrdu akusá ku tráfiko seksual di menor den yüli 2019, i a kometé suisidio un luna despues den un prizòn na New York, miéntras e tabata warda sentensia.
E fiskalnan di New York a pidi e hues di Manhattan Alison Nathan pa rechasá e petishon di fiansa di Maxwell. E suma ta sinku mion dòler a kambio di ‘huisarest’, pa evitá ku e ta purba skapa.
Fiskalnan a afirmá ku el a purba skapa na momentu ku agentenan di FBI a arest’é na New Hampshire, kaminda e tabata skonde.
Maxwell di 58 aña tin pasport d Fransia, Gran Bretaña i Merka. el a wòrdu akusá ku tráfiko seksual di adolesente pa satisfasé deseo di su pareha, transporte di menornan pa un otro estado ku e mesun intenshon aki i gaña bou di huramentu.