BOGOTA, AP.- E eks hefe di negosiashonnan di pas di e movementu rebelde FARC di Colombia a disidí pa muda pa un kampamentu rural pa eks guerieronan, meimei di indikashonnan ku pronto e por wòrdu arestá komo parti di un investigashon merikano riba droga.
E lider rebelde konosí komo Ivan Marquez a avisá e gobièrnu kolombiano di su plannan djaweps atraves di un karta. El a bisa ku e lo muda temporalmente pa un zona rebelde di transishon, den provinsia di Caqueta, te ora tin mas klaridat i sertidumbre riba loke lo pasa despues.
E no a duna mas detaye di loke e kier a bisa pero a reiterá ku e ta komprometé ku e proseso di pas di 2016, mediante kual kasi 7.000 gueriero a entregá nan arma i a forma un partido polítiko.
E luna aki, outoridat kolombiano a detené un ideólogo haltu di FARC konosí komo Jesus Santrich, bou di kargonan merikano di konspirashon pa kontrabanda 10 tonelada di kokaina den Merka den komplisidat ku e kartel mehikano di Sinaloa.
E aresto a kombertí Santrich den e promé lider di nivel haltu di e proseso di pas pa wòrdu akusá di delitonan grave. Esaki a hasi e base rebelde nervioso ku ya tabata preokupá pa e tardansa den aplikashon di e akuerdo históriko.
Den e operashon dirigí pa Merka, e subrino di Marquez, Marlon Marin tambe a wòrdu detené, kende a wòrdu ekstraditá pa New York i kende ta koperando ku fiskalnan na kargo di e kaso.
Marquez a insinuá ku e por ta e siguiente persona pa wòrdu detené i a akusá gobièrnunan di Merka i Colombia di organisá e arestonan pa sabotiá e proseso di pas.
