Eks kliente: muchanan den JJIC (GOG) mester haña seguridat

…Genesis den oranan di dia dilanti porta di JJIC (GOG) ku su akshon…

WILLEMSTAD.- Señora Genesis un eks-kliente di GOG awor JJIC a bai manifestá dilanti dje instituto pa hala atenshon di prinsipalmente minister di hustisia Shalten Hato, kaminda e ta pa e muchanan den e instituto haña seguridat. E ke mas akshon i ménos sensashon. Dia e tabatin 13 aña el a drenta den GOG, i a sali ku 15 aña.
Den deklarashon pa EXTRA, Genesis a bisa ora el a mira e vidio di un kliente den e instituto, kende a deklará ku kier a batié ku klòp, Genesis a rekordá tempu e tabata den e instituto, el a yora hopi pa yud’e. Paso despues di un interkambio ku tres bewaker, nan a batié, choke i hink’e den un sèl tur na fekalia, kolchon shushi, i yen di sangura. Su manifestashon ta pa mustra ku abusu kontra di e klientenan no a sosodé 15 aña pasá so, pero awor tambe den 2026.

Di otro banda Genesis ta gradisí GOG masha hopi mes, paso ta den e instansia aki el a siña lesa i skirbi, i a studia. El a gradisí su mener di skol ku a dun’e un bon enseñansa, edukashon ku awe e por lesa i skirbi. Tambe algun lider ku nan kurason ta pa e muchanan. E ta gradisí Dios ku a guia su bida te awe.
El a sigui bisa ku ta hinka un mucha den un instansia, kaminda e mester haña guia i edukashon. Tempu di Genesis e ta kòrda ku tabatin lider di e paviljoen Kara pa Solo ku no tabata trata nan bon. Aparentemente lo tabatin lider ku a tene pa kòrta su karson dilanti di un bewaker.
Genesis a sigui bisa ku en prinsipio e no mester a keda interná den GOG. Danki na su mama i famia di kriansa ku a yud’e debí ku e tabata rebelde i mala mucha, nan a disidí di hink’e den GOG. “No mester a hinka mi den GOG kaminda tin mucha ku a mata, huma droga, loke nan ku nunka el a hasi”. E mester a bai un otro instituto, segun Genesis.
Awe e ke bisa ku ta bèrdat ta maltratá mucha den GOG. El a gradisí e forma kon minister Hato a sali bin dilanti. “Pero e minister mester duna muchanan den GOG seguridat. No por t’asina ku nan ta drenta ku mal komportashon i sali un mònster. Mi ke pa minister Hato trese kambio den JJIC (GOG). Mi ke mas akshon i ménos sensashon”, Genesis a terminá bisando.
Mas anochi ora a bira konosí ku e direktor sra. Charetti Pinedo a pone su funshon na disposishon di gobièrnu, el a regresá i tabata notifiká e muchanan.

1 of 2

…anochi el a bai anunsiá na e muchanan di e retiro di e direktor…