Genaro Garcia Luna riba potrèt di 2012, tempu ku e tabata direktor di Polis Federal di México.
CIUDAD DE MEXICO (AFP).- Un korte di Merka a kondená e eks sekretario di Seguridat Públiko di México, Genaro Garcia Luna, i su kasá pa paga 2.4 mion dollar na e estado mehikano pa un kaso di korupshon.
Ta trata dje di dos kondena kontra dje eks-funshonario den e pais ei, despues ku den òktober el a keda sentensiá na 39 aña di prizòn pa a protehá e kartel di Sinaloa a kambio di miónes di dollar komo soborno. E sentensia ei a kai despues di un kaso penal den kua vários eks-miembro dje grupo kriminal a presentá komo testigu.
E sentensia ta korespondé na un demanda sivil ku México a presentá den sèptèmber di 2021 kontra di Garcia Luna i su kasá Linda Cristina Pereyra, kende nan a akusá di ta forma parti di un “grupo di korupshon i labamentu di sèn” ku a firma desena di kontraktnan públiko. E labamentu di plaka a tuma lugá na Merka.
E Unidat di Inteligensia Finansiero di Sekretario di Finansa a bisa den un komunikado ku “e sentensia ta pareu na tres biaha e kantidat di plaka pa kua gobièrnu di México a demandá nan originalmente”, konforme e lei di Florida, kaminda e kaso a tuma lugá.
Garcia Luna (56) tabata sekretario di Seguridat Públiko durante e gobièrnu dje presidente konservador Felipe Calderón (2006-2012).
1e eks-funshonario a keda detené den desèmber di 2019 na Dallas, Texas. El a biba for di 2012 na Merka.
Gobièrnu mehikano a bisa ku un ‘holding’ empresarial ku laso familiar Garcia Luna a risibí komo 30 kontrakt ku vários organisashon di seguridat públiko, na balor di 745.9 mion dollar.
