BRASILIA, BRASIL (AFP).- E eks presidente brasilero Jair Bolsonaro a benefisiá su mes di un skema ilegal pa bende hoyanan i otro artíkulonan di luho risibí pa Brasil komo regalonan ofisial i balorá na 1.2 mion dollar, segun konklushon di un investigashon polisial. Polis Federal siman pasá a rekomendá pa akusá Bolsonaro i otro 11 persona pa asosiashon kriminal, labamentu di sèn i apropiashon di biennan públiko, esaki den e periodo di òktober 2019 te ku e último dia di mandato dje ultraderechista, riba 31 di desèmber di 2022.
Bolsonaro, ku ta bisa ku ta trata di “persekushon” ku vários kaso hudisial kontra di su persona, ta nenga di a kometé delito den e maneho di prendanan.
Segun investigashon polisial, un grupo di persona tabata desviá vários opsekio di balor risibí pa e eks presidente Jair Bolsonaro durante di biahenan internashonal.
Segun outoridatnan, e operashon tabata buska pa bende prendanan den eksterior ku e meta pa esaki bira un ganashi pa e presidente di e tempu ei.
Algun kos a keda bendé i e plaka kèsh a bai den saku dje eks presidente, sin usa e sistema bankario formal, segun e informe entregá na Supremo Tribunal Federal. E balor dje regalonan a totalisá 1.22 mion dollar.
E kaso aki a bira notisia den mart di 2023, ora ku a surgi e notisia ku agentenan di belasting den 2021 a konfiská un kantidat di prenda di un funshonario di gobièrnu di Bolsonaro ora ku esaki a regresá di un biahe ofisial for di Medio Oriente.
E informe polisial di kasi 500 página a referí na un renchi, armbant, oloshi dje marka suiso Chopard i otro prendanan na un balor total di US$828.000.
E investigashon a rastra e ruta ku algun dje ophetonan a sigui den man di asesornan di Bolsonaro, inkluso hasiendo uso di avion presidensial, pa yega na negoshinan spesialisá na Merka kaminda nan a keda inspekshoná i bendé.
