Èks-presidente ekuatoriano (2017-2021) Lenin Moreno (den ròlstul) huntu ku e.o. su kasá Rocio Gonzalez Navas na nan yegada ayera na sala di korte na Quito.
QUITO, Ecuador (AFP).- Hustisia di Ecuador a deklará e èks-presidente, Lenin Moreno, den un kaso di korupshon relashoná ku konstrukshon di e sentral hidroeléktriko mas grandi dje pais. E proyekto a keda otorgá na e kompania chines Sinohydro.
Di 73 aña, Moreno lo tende su kondena despues di desishon di Supremo Korte Nashonal i Hustisia. Ministerio públiko a demandá kastigu di 6 aña i seis luna di prizòn pa e èks-mandatario (2017-2021) i tambe pa e èks visepresidente.
Den un sentensia di promé instansia, korte a haña Moreno responsabel di a benefisiá su mes ku sistema di korupshon relashoná ku e sentral Coca Codo Sinclair, ku a kuminsá operá de 2016. Miéntras ku e tabata vise presidente dje èks-mandatario sosialista Rafael Correa (2007-2013), e famia di Moreno a risibí den kareda di un mion dòler di soborno di parti di Sinohydro pa faboresé e konstrukshon, segun ministerio públiko.
Un tribuna di Korte Nashonal di Hustisia ku sede na Quito, a diktaminá ku kuater di esnan prosesá, inkluso Lenin M, ta responsabel dje delito.
“Mi no a risibí ni un sèn di parti di Sinohydro”, segun e èks-presidente despues di a skucha e desishon di hustisia. Moreno, kende ta den ròlstul, tambe a funshoná komo enviado spesial pa temanan di diskapasidat di Nashonnan Uní na Geneve i komo representante di un organisashon latino pa personanan ku limitashon físiko.
Correa a goberná Ecuador durante di un dékada te ku 2017 i a promové e elekshon di Moreno komo presidente. Pero Moreno a distansiá su mes for di gobièrnu ora ku el a dal un buèlta pa derecha i a aserká Merka. Den e kaso tin komo binti otro persona envolví, entre nan kasá i yu muhé di Moreno, empresarionan i un èks-embahador chines na Quito.
Correa ta biba na Bélgika for di despues di a baha komo presidente i a keda kondená den ousensia den 2020 na ocho aña di prizòn pa korupshon.
