Ayera despues ku e detenshon a bira konosí, filipinonan a tene un protesta i a demanda hustisia pa e víktimanan ku a kai durante e guera ku eks-presidente filipino Rodrigo Duterte a hiba kontra tur hende ku tabatin di aber ku droga.
MANILA, Philippines (AFP).- E eks-presidente di Filipina, Rodrigo Duterte, ayera tabata den avion rumbo pa Den Haag despues di a keda detené na aeropuerto di Manila riba un órden di Korte Penal Internashonal, ku ta akus’é di krímennan kontra di humanidat.
Organisashonnan di Derechinan Humano ta kalkulá ku e kampaña durante di su mandato (2016-2022) den su guera kontra di narkotráfiko a kobra bida di desena di míles di hende. Mayoria di e víktimanan tabata hendenan pober, hopi biaha sin prueba di nan relashon ku narkotráfiko.
Na momentu ku e yega Den Haag, Duterte (79 aña) lo keda transferí pa e sede di Korte Penal Internashonal, ku a start un investigashon riba su kampaña ku a kuminsá den 2016.
E buelo ku a traslad’é a sali for di e espasio aéreo filipino, segun a keda konfirmá pa e hefe di estado Ferdinand Marcos, durante un konferensia di prensa.
“E avion ta bai Den Haag, kaminda e eks-presidente lo tin ku para responsabel pa akusashonnan di krímennan kontra di humanidat relashoná ku su guera sangriento kontra di droga”.
“Na momentu ku e sospechoso ta bou kustodia di Korte Penal Internashonal, lo programá un oudiensia”, segun Fadi Abdullah, bosero di e korte.
Durante di su gobièrnu, Duterte a instruí polisnan pa tira ku intenshon di mata e sospechosonan di narkotráfiko den kaso ku e polisnan su bida ta kore peliger. El a insistí ku e polítika ei tabata pa salba famianan i evitá ku Filipinas lo bira un estado di narko.
Den luna di òktober, durante un investigashon di Senado riba e guera kontra di droga, Duterte a bisa di “lo no pidi diskulpa off preteksto” pa su akshonnan.
