…Eks-presidente franses Nicolas Sarkozy a skapa ku e no ta bai prizòn…
PARIS, Fransia (AFP).- Outoridatnan franses a bisti e eks-presidente konservador Nicolas Sarkozy, un banchi elektróniko despues di su kondena pa korupshon i toma di desishonnan na interes propio.
Den desèmber, Korte di Kasashon -e máksimo tribunal franses- a konfirmá su kondena di un aña di prizòn, pero a permití pa e kumpli ku e sentensia ku banchi elektróniko sin tin mester bai prizòn.
“E kaso a sigui su kurso, mi no tin ningun komentario”, segun e abogado dje eks-presidente, Jacqueline Lafont. Personanan yegá na e eks-presidente tampoko ker a hasi un deklarashon.
Sarkozy siman pasá a keda konvoká pa tribunal di Paris pa pone na su konosementu e siguiente stapnan despues di kondena kontra di un eks-hefe di estado.
Sarkozy, kende ta kasá ku e modelo i kantante Carla Bruni, por solisitá awor dirèkt pa libertat kondishonal manera lei ta permití, despues ku 28 di yanüari el a kumpli 70 aña.
Segun hustisia, e eks-presidente i su abogado Thierry Herzog den 2014, a sera un “pakto di korupshon” ku Gilbert Azibert, un hues di Tribunal di Kasashon. E meta tabata pa Azibert purba na influensiá un kaso ku Sarkozy a presentá relashoná ku donashonnan ilegal na su partido, kaso ku despues el a bandoná.
