Eks presidente hondureño Juan Orlando Hernandez (2016-2022) ta papia ku su siguidónan na momento ku el a yega Korte Supremo di Hustisia na Tegucigalpa.
TEGUCIGALPA (AFP).- E eks presidente hondureño Juan Orlando Hernandez (2014-2022), pordoná pa Donald Trump despues di un kondena pa narkotráfiko na Merka, ayera a boga pa “libertat definitivo” dje kaso den su pais kaminda e ta keda akusá di froude i labamentu di plaka.
Hernandez den luna di yüli a regresá for di Merka despues ku hustisia hondureño a suspendé un órden di kaptura pa motibu di algun akusashon kontra di su persona. Ta akus’é di a desviá 2 mion dòler di fondonan públiko pa su kampaña presidensial den 2013.
Despues di un oudiensia den tribunal di Tegucigalpa, e eks mandatario a bisa di ta spera “un karta di libertat definitivo” den e proseso di korupshon kontra di su persona.
Hernandez ta pidi pa di forma definitivo stòp ku e kaso, manera a sosodé ku otro akusadonan den e mesun kaso aki, entre nan e eks presidente Porfirio Lobo (2010-2014).
“Nos ta spera ku e kaso lo no sigui i ku no tin nada den korte”, segun Angie Colindres abogado di Hernandez.
E oudiensia a kuminsá dia 12 di ougùstùs i a sigui djaluna último. Den ámbos, ministerio públiko i defensa a presentá nan pruebanan i a pidi reseso pa por evaluá esakinan.
Segun Ministerio Públiko, Hernandez a tuma parti na un grupo ku a desviá plaka di proyektonan agríkola pa su promé kampaña, miéntras ku e tabata presidí Kongreso.
E eks gobernante ta kalifiká e akusashon komo “yagmentu riba hende” i “persekushon polítiko”, ekspreshonnan ku tambe el a usa pa referí na su kaso pa narkotráfiko na Merka.
Dia 3 di ougùstùs último, e hues ku ta trata su kaso a permiti’é pa sigui e proseso den libertat, pero ku prohibishon pa e sali for di e pais.
Den 2024, un hues federal di New York a kondená Hernandez na 45 aña di prizòn pa a yuda introdusí algun shen tòn di kokaina den Merka.
Pero, den novèmber último, Trump a pordon’é bisando ku e tabata víktima di un inhustisia di su antesesor demokrat Joe Biden, ounke ku bon parti dje investigashon a tuma lugá durante e promé mandato dje republikano.
Hernandez ku tabatin un karera polítiko marká pa denunsianan di korupshon, ta aspirá pa rekuperá por lo ménos 130 propiedat ku a keda konfiská ora ku a ekstradit’é pa Merka.
Su ruman, Juan Antonio Hernandez, na Merka ta kumpli kastigu di bida larga di prizòn pa trafikashon di droga.
