Eks-presidente argentino, Cristina Fernandez de Kirchner, ta zuai sostenedónan na momento di yega na sede prinsipal di Partido Justicialista den Buenos Aires.
BUENSO AIRES (AFP).- E èks-presidente argentino Cristina Kirchner (sentro iskierda) ayera a hasi un yamada riba su siguidónan pa nan organisá teniendo kuenta ku e posibilidat di su aresto, ku segun su persona ta un persekushon hudisial riba su bida.
E èks mandatario (2007-2011 i 2011-2015) i èks vise-presidente (2019-2023) a keda kondená na seis aña di prizòn komo tambe inhabilitashon polítiko debí na korupshon, pero e no a kai prezu pa motibu ku Korte Supremo tin pendiente pa disidí si e ta aseptá pa analisá un demanda di keho di parti di su defensa.
Meimei di spekulashonnan di ku Korte na kualke momento lo duna veredikto kontra di su persona, algun shen militante peronista a reuní dilanti e sede di Partido Justicialista (PJ), prinsipal forsa opositor na gobièrnu, di kua e dirigentenan deklará di ta “alerta” pa un eventual fayo kontra dje èks-presidente.
“Miéntras ku esnan ku a hòrta i a hinka pais den debe ta kana liber riba kaya, pa ami kasi será ta un sertifikado di dignidat”, segun Kirchner, kritikando e gobièrnu di Javier Milei.
Kirchner, di 72 aña, lo kompetí pa un asiento den e terser distrito elektoral dje provinsia di Buenos Aires, esun mas poblá di Argentina, kaminda peronismo ta fuerte. Den kaso ku e logra un asiento lo e tin inmunidat miéntras ku e ta den su mandato di kuater aña.
Pero den kaso ku Korte rechasá e demanda di Kirchner, e no por presentá. Pa motibu ku e ta riba 70 aña di edat, lo e por pidi aresto na kas
