BOGOTA (AFP).- E eks-presidente kolombiano Alvaro Uribe, ayera a nenga su responsabilidatnan den dos masakre i e asesinato di un defensor di derechinan humano den dékada di 1990. El a hasi esei promé di presentá dilanti di ministerio públiko ku ta investig’é pa e krímennan ei.
E akusashon ta pone un relashon entre e poderoso polítiko ku e proseso hudisial, i un biaha mas ta pone un konekshon di supuesto relashon ku paramilitarnan den e tempu ku komo gobernador i presidente el a hiba un ofensiva kontra di gueria.
E biaha’ki lo skucha vershon dje eks-presidente riba e masakrenan paramilitar di El Aro (1997) i La Granja (1996) den e region di Antioquia, tempu ku e tabata gobernador. Tambe e asesinato di Jesus Maria Valle den 1998, lider sosial asesiná den e siudat di Medellin despues ku el a denunsiá e masakrenan.
“M’a kere di a sirbi e nashon, pero awe mi tin ku presentá pa deklará ku mi no ta un asesino”, segun e polítiko di 74 aña, promé di a drenta e seshon di interogashon.
Uribe, kende a hiba un ofensiva sangriente kontra di gueria durante di su dos mandatonan presidensial -entre 2002 i 2010- ta bou di sospecho pa relashon ku paramilitarnan.
Kompañá pa un seguridat fuerte, ku eskolta i eskudo, el a akusá su “atversarionan polítiko”. Semper el a bisa di ta víktima di un persekushon polítiko. Den ougùstùs di 2025 el a keda kondená na diesdos aña di prizòn na kas pa a soborná paramilitarnan enkarselá pa nan no relashoná su persona ku skuadronnan di ultraderecha. Pero mas despues un tribunal a revoká e kastigu. Durante dje masakrenan, e par militarnan a mata desena di kampesino, a bai ku nan krionan di bestia i a kima nan kasnan. E víktimanan i testigunan a sigurá di a mira un helikòpter di gobièrnu di Antioquia bula riba nan i kustodiá e paramilitarnan durante e dianan di masakre di El Aro.
