LIMA, Perú (AFP).- E eks-presidente peruano Pedro Castillo a drenta un wèlga di hamber den e prizòn kaminda e ta será. Su wèlga di hamber ta komo protesta pa e kaso kontra di su persona, akusá di rebelion despues di su intento frakasá pa disolvé Kongreso den 2022.
“E desishon di un wèlga di hamber ta pasobra e ta den un protesta pasífiko pa mundu tuma konosementu ku e ta prezu di manera inhustu, arbitrario”, segun el a bisa na e radio RPP.
Castillo, di 55 aña, lo keda den wèlga di hamber te ora ku nan kambia e tribunal di Korte Supremo ku ta husg’é i ku e keda liberá, segun su abogado.
“E no ta di akuerdo ku su detenshon i ta pidi un tribunal imparsial”, Ayala a bisa.
E kaso penal a kuminsá dia 4 di mart den un sala pegá ku e prizòn chikitu pa e eks-mandatario kaminda e ta será, den ost di Lima. Fiskal a hasi un demanda di 34 aña di prizòn.
Den e promé oudiensia e akusado a kalifiká e proseso komo “un pantomina” pa motibu ku un dje tres huesnan adelantá a duna opinion kontra di su persona.
Castillo ta un eks-sindikalista di iskierda radikal ku ta den kastigu preventivo for di desèmber di 2022, tempu ku el a keda detené pa un gòlpi di estado ku a frakasá.
