Eks-presidente peruano (2011-2016), Ollanta Humala, ta papia na telefòn despues di a tende sentensia di 15 aña di prizòn kontra di su persona. El a keda detené di forma inmediato
LIMA, Perú (AFP).- Hustisia peruano a kondená e eks-presidente Ollanta Humala na 15 aña di prizòn, despues di a hañ’é kulpabel di labamentu di sèn despues di a risibí pagonan ilegal dje parti dje kompania di kontratista Odebrecht i di gobièrnu di Venezuela. E plaka risibí tabata pa kampañanan di 2011 i 2006, respektivamente.
Humala, di 62 aña, a keda detené den sala di korte despues ku a duna e veredikto, ku a pone fin na tres aña di oudiensia kontra dje eks-teniente koronal di sentro iskierdia ku a goberná Perú entre 2011 i 2016,
Ta e di dos eks-gobernante kondená pa hustisia di su pais, di un total di kuater eks-presidente envolví den kasonan di korupshon di Odebrecht den Perú.
E fiskal dje kaso, German Juarez, a manifestá su satisfakshon ku e desishon hudisial “ku for di un prinsipio a keda atendé di forma ophetivo i imparsial”.
Odebrecht, di kua su skandal di soborno i korupshon a ekstendé pa vários pais di Amérika Latina, den 2016 a rekonosé di a parti desena di miónes di dollar komo soborno i donashon elektoral ilegal na Perú for di kuminsamentu di siglo XXI.
Segun ministerio públiko, e skandal a envolví otro eks-presidentenan tambe, Alan García (2006-2011), kende a kometé suisidio den 2019 promé ku el a keda detené; Pedro Pablo Kuczynski (2016-2018), ainda bou di investigashon; i Alejandro Toledo (2001-2006).
Toledo a keda kondená den 2024 na mas ku 20 aña di prizòn pa risibí sobornonan mionario a kambio di trabounan di konstrukshon di su gobièrnu.
