WASHIGNTON, USA (AFP).- E èks-promé dama di Merka Rosalynn Carter, kasá dje èks-presidente Jimmy Cartner (1977-1981), a muri na edat di 96 aña den su kas na Georgia.

E èks-promé dama Rosalynn Carter, un defensor apashoná di salú mental, kuido i derechinan di hende muhé, a fayesé djadumingu 19 di novèmber pa 14:10 or na su kas na Plains, Georgia. “El a muri di forma trankil huntu ku su famia band’i dje”, segun Carter Center a duna di konosé.

Rekonosé huntu ku su kasá pa un imágen públiko modesto i su lucha pa derechinan humano i demokrasia, Carter tabata risibí tratamentu djabièrnè den su kas huntu ku e èks-presidente, despues ku den luna di mei nan a diagnostiká demensia serka su persona.

“Rosalynn tabata mi kompañera den tur loke m’a logra”, Jimmy Carter a bisa den un komunikado.

“El a duna mi guia i aliento ora mi tabatin mester. Miéntras ku Rosalynn tabata na mundu, semper mi tabata sa ku tin un hende ku tabata stima mi i tabata apoyá mi persona”, segun e èks-mandatario demokrat.

Una bes den White House, Rosalynn Carter a hinka su mes den polítika. “El a asistí na reunionnan importante di gabinete i na e seshonnan informativo mas importante, tambe a representá ku frekuensia e hefe di Ehekutivo den aktonan seremonial i tambe tabata kara dje mandatario den paisnan latinoamerikano”, segun nan ta splika riba wèpsait.

Rosalynn Carter a nase den e siudat chikí di Plains riba 18 di ougùstùs 1927. Tempu ku e tabatin 13 aña su tata a muri i el  a traha huntu ku su mama, kende a sigui karga e famia. El a konosé Jimmy Carter den 1945 miéntras ku e tabata studia na universidat. Nan a kasa na aña 1946.

LAGA UN KOMENTARIO

Please enter your comment!
Please enter your name here