E èks wes Lambertina Galeana kende despues di diesun aña ta keda detené komo sospechoso den e kaso di desaparishon di 43 studiante mehikana.
CIUDAD DE MEXICO.- E éks-presidente femenino di poder hudisial di estado mehikano di Guerrero a keda detené pa aparente relashon ku e desaparishon di 43 studiante, suseso ku a tuma lugá den e region ei den 2014.
Lambertina Galeana a keda detené bou di akusashon di desaparishon fòrsá i ta relashon’é tambe ku skondementu di videonan ku a registrá e sekuestro dje alumnonan, segun Sekretaria di Seguridat federal a bisa den un komunikado.
E 43 studiantenan dje skol di maestro di Ayotzinapa a disparsé e anochi di 26 di sèptèmber di 2014 den e siudat Iguala, kaminda nan tabata presente pa kue bùs ku lo a trasladá nan pa e kapital mehikano pa tuma parti na un protesta.
E èks-funshonario a keda detené den su kas na Chilpancingo, kapital estatal, i lo keda presentá dilanti di un wes federal.
Mas ku dies aña despues di desaparishon dje studiantenan, a logra identifiká restonan mortal di solamente tres di nan i nunka ningun hende a keda sentensiá pa e sekuestro.
Durante e gobièrnu di presidente Enrique Peña Nieto (2012-2018), outoridatnan a presentá e yamada “Bèrdat Históriko”, segun kua e 43 hóbennan a keda masakrá pa narkotrafikantenan ku komplisidat di polis di Iguala.
Pero e rumornan a keda barí for di mesa pa e presidente Andrés Manuel López Obrador (2018-2024) i ekspertonan di Komishon Interamerikano di Derechinan Humano ku a investigá e kaso.
Den 2022, un komishon di bèrdat kreá pa e gobièrnu di Lopez Obrador a kalifiká e kaso komo un “krimen di estado” i a bisa ku militarnan ta kompartí e responsabilidat, sea di forma direkto òf pa negligensia.
Famianan dje víktimanan e tempu ei a akusá e mandatario di no a hasi lo sufisiente kontra di ehérsito.
E funshonario di mayor rango detené pa e kaso ta Jesus Murillo Karam, èks-prokurador general mehikano i responsabel prinsipal dje investigashon hasí pa e gobièrnu di Peña Nieto.
