MEXICO, AP.- Agentenan federal a detené despues di tres aña di búskeda e eks hefe di polis di Iguala, ligá na desaparishon di 43 studiante na aña 2014, i ku segun outoridatnan mehikano por ta klave pa konosé e paradero di e hóbennan aki.
E Komishon Nashonal di Seguridat a informá ku agentenan federal a kapturá Felipe Floresé den siudat di Iguala mes, den estado sùit di Guerrero.
Prokurador general Arely Gómez a señalá den su kuenta di Twitter ku e aresto lo permití buska un deklarashon fundamental pa aklarashon di e echonan den Iguala.
Studiantenan di Normal Rural di Ayotzinapa, un skol pa dosente, a keda detené pa polis di Iguala dia 26 di sèptèmber di 2014.
E teoria prinsipal di outoridatnan mehikano tabata ku e studiantenan a keda entregá na un grupo di narkotrafikante, ku a mata nan i sende nan na kandela. Sinembargo, ekspertonan independiente ku a revisá e kaso a pone un duda den e afirmashon di ku nan a keda kimá.
Famianan di e hóbennan ta mantené reklamonan na outoridatnan pa nan keda buska e hóbennan aki.
Desaparishon i inkapasidat di e outoridatnan pa aklará loke a pasa ku e studiantenan ta un gòlpi pa e gobièrnu di e presidente Enrique Peña Nieto.
