RIVERSIDE, CALIFORNIA, MERKA, AP.- Un eks kachó di polis den un bario na sùit California, a ataká i lastra un hòmber despues ku esaki a dun’é awa, pensando ku e animal tabatin set. Asina outoridatnan a informá djamars. Famianan di e hòmber a wòrdu obligá pa usa kuchú di karni pa hinka e pastor aleman djadumingu, despues ku e kachó no kier a laga e víktima bai i a lastr’é den e kurá dilanti di un kas riba kaya. Asina e bosero di Departamentu di Servisio pa Animal di kondado Riverside, John Welsh a informá na The Associated Press.
E hòmber di 20 aña di edat, a keda interná den hospital pa e mordénan ku el a risibí na su brasa i pia. E kachó, di un unidat di polis di kondado di Los Angeles, mester a wòrdu sakrifiká debí na e gravedat di su leshonnan.
Segun Welsh, e kachó a bebe algu di e awa i despues a bula riba e hòmber. Na e momentu ei e animal a klaba su djente den brasa di e hòmber. Miéntras e víktima tabata gritando, pidiendo pa yudansa, miembronan di su famia a purba obligá e kachó pa lag’é lòs dor di skòp i moket’é. pero despues nan a kore drenta kas pa kue kuchú pasó e animal no kier a laga e hòmber lòs. E kachó a wòrdu hinká vários biaha.
Un agente di kòntròl a yega na e sitio i e kachó heridá a obedesé inmediatamente, posiblemente debí na e unifòrm di esaki. Na e momentu ei el a laga e hòmber lòs, segun Welsh.
E kachó a permití e agente Will Luna pa limpia su garganta.
“Mi a subi esaki i ku un solo mando, apesar di su leshonnan, e kachó a bula den un di e kompartimentunan”, segun Luna a informá den un komunikado di prensa.
