BATON ROUGE, LOUISIANA, MERKA, AP.- E eks dirigente di Ku Klux Klan David Duke a anunsiá ku e ta postulá pa Senado di Merka.
“Ku orguyo mi ta anunsiá i kandidatura pa Senado di Merka”, segun Duke a bisa den un video publiká riba su wèpsait.El a agregá: “Mi ta kere den igualdat di derecho pa tur hende i rèspèt pa tur merikano. Sinembargo, loke ta distinguí ami ta ku mi tambe ta eksigí rèspèt pa derechi i herensia kultural di merikanonan di asendensia europeo”.
E anunsio ta sosodé, meimei di tenshonnan rasial profundo den Louisiana, kaminda un hòmber koló skur a wòrdu asesiná pa polisnan koló kla resientemente. Tambe tres polis a keda asesiná pa un hòmber koló skur. Esaki ta surgi tambe, e dia siguiente ku Trump a aseptá nominashon presidensial di Partido Republikano.
Komo republikano, Duke lo ta postulando pa e posishon bandoná pa e republikano David Vitter.
Mas di binti kandidato a postulá pa e asiento, pero el a keda habrí debí ku Vitter a disidí pa no postulá pa reelekshon dia 8 di novèmber.
