siguí pa lansamentu di e kantika ‘Mand’e bue’ pa seri dokumental
WILLEMSTAD.- E proyekto Awa pa Kòrsou a organisá dos anochi inspirativo ku seshon di open mic djaluna i djamars último. Djárason, e proyekto a lansa un kansion ku kolaborashon di e kantante Kevv, spesialmente produsí pa e proyekto.
Seshon habrí di Mic Jammz
E seshonnan di open mic a tuma lugá na dos lokalidat di proyekto: lanthùis Savonet i Lanthùis Rooi Catootje. Ku e anochinan akí e proyekto kier a stimulá partisipashon di públiko rònt di e tema di awa. Bou di guia di lider di diskushon Yoeri Oltheten, a enkurashá bishitante pa kompartí eksperensia personal i konosementu históriko tokante awa i kon ta manehá esaki.
E artistanan Elia Isenia i Sorandy St. Jacobs a agregá èkstra koló na e anochinan dor di kanta na Guene i kompartí partikularidat, dicho i proverbio tokante awa na Papiamentu. E seshonnan a atraé mas o ménos 100 interesado.
E anochinan a keda organisá pa partner di proyekto Universidat di Kòrsou den kolaborashon ku personal i direktiva di CARMABI i Fundashon Mongui Maduro.
E kantika ‘Mand’e bue’
Pa konkluí e proyekto, pronto lo presentá un dokumental. Fundashon NAAM a opta añadí un kantika na e dokumental akí inspirá pa kantika di trabou tradishonal relashoná ku awa. For di e Kolekshon Zikinza di Pader Paul Brenneker i Elis Juliana, a selektá grabashon no. 0026, Mand’e bue, kantá pa Manchi di Linda di Martha Koosje.
Den e vershon nobo, e kansion ta kuminsá ku e grabashon original, despues ta pasa pa un interpretashon moderno di Kevv, kende a proveé tantu letra komo melodia. E perkushonista Tshepho Seshaba tambe a duna un kontribushon balioso na e produkshon.
Kantika di trabou bieu hopi bia tin un karakter simbóliko òf kontekstual.
E kontenido ta un kolekshon di diferente pensamentunan lòs tokante e goso pa pronto tin awa di bebe pa hende i bestia. Shon Bunita, Dama Bunita, ta doño di e plantashi i bue ta un toro kapá. Tabata kanta e kantika akí ora di koba pos.
A lansa e kantika Mand’e bue djárason anochi i por skuch’é awor via e plataformanan SoundCloud, Spotify i iTunes di Kevv, i tambe via e kanalnan di Fundashon NAAM.
Tokante Awa pa Kòrsou
Awa pa Kòrsou ta un kolaborashon entre Fundashon NAAM, Monumentenfonds, CARMABI, Fundashon Mongui Maduro i Universidat di Kòrsou dr. Moises da Costa Gomez den kuadro di Heritage Deal. E proyekto ta enfoká riba trabou di investigashon i restourashon den kuadro di maneho históriko di awa na Kòrsou. E impakto di kambio di klima ta sentral, ku atenshon pa sekura, strès di kalor i inundashon.
Restourando sistema di awa bieu, edukashon i aktividat públiko, e organisashonnan enbolbí ke kontribuí na uso sostenibel di awa i konsientisashon di e importansia di awa den pasado i futuro di e isla.
Lesa mas tokante e proyekto den e boletinnan Awa pa Kòrsou i sigui e proseso via e kanalnan di media sosial di Fundashon NAAM.
