Van Haasen: PVV ta dispuesto di entregá un moshon
WILLEMSTAD.- PVV ta kontra di impuestonan pa klima manera e “vliegtax” ku Hulanda ke introdusí riba tur buelo di distansia largu. Si e gabinete ke tene tòg na e impuesto aki PVV ta haña ku mester por hasi un eksonerashon pa Karibe. Meskos ku Fransia a eksonerá su teritorionan ultramar. Asina Parlamentario pa partido PVV, Peter van Haasen a trese dilanti durante un debate den komishon di relashonnan den Reino di parlamento hulandes.
“Hulanda i Fransia ta kompartí un kompania di aviashon, KLM i un isla, St. Maarten. Kon por hustifiká ku ta bira mas karu i difísil pa yega islanan manera St. Maarten, Saba i St. Eustatius. Konektividat aéreo ta di importansia krusial pa tur 6 isla den Karibe entre otro pa motibunan ekonómiko, di salubridat, turismo i enseñansa”, Van Haasen ta bisa.
E ta mustra ku ora ku turismo riba e islanan a kai den otro debí na e pandemia di Corona, Hulanda mester a kai aden ku ayudo finansiero. “Si awor Hulanda mes ta mina e sektor turismo ku introdukshon di un ‘vliegtax’, Hulanda ta kobra su propio buraku finansiero.” Pa e motibu aki Van Haasen ta urgi e gobièrnu Hulandes pa regla eksonerashon di e “vliegtax” pa e islanan den Karibe meskos ku Fransia a hasi esaki pa su teritorionan i si gobièrnu no ta dispuesto pa hasi esaki di su mes, PVV lo ta dispuesto pa entregá un moshon pa logra esaki.
Van Haasen a kuminsá si disertashon mustrando ku na su opinion e relashonnan den Reino no ta funshoná konforme espíritu di e Statuto di Reino. “Statuto di Reino ta bisa ku kada pais mester lèn riba su propio forsa (“steunend op eigen kracht”), pero e ta kontrali na e realidat ku tur aña algun 100 mion euro di e pagadó di impuesto hulandes mester bai pa e islanan den Karibe.”
Tambe Van Haasen ta indiká ku Statuto di Reino ta bisa ku mester tin e sentido di kombibensia pa yuda otro (“doch met de wil elkander bij te staan”), loke segun segun e parlamentario ta enserá den realidat, manera durante e pandemia di Corona, ku ora e ekonomia di e islanan a kai den otro, Hulanda mester a duna ayudo pa un suma di 1,3 miar euro.
“Pa PPV ta importante ku e islanan den Karibe ta ekonómikamente outo sufisiente. No solamente pa redusí e dependensia riba Hulanda, pero tambe pa e orguyo i balor propio di e islanan.” Van Haasen ta mustra ku e ekonomianan ta krese atrobe debí na turismo. “Pero esaki ketu bai ta frágil. Un shòk eksterno i tur kos ta kai den otro atrobe. Diversifikashon ekonómiko ta nesesario, no solamente riba papel pero tambe den práktika.”
Van Haasen a referí alabes na un karta di sekretario di estado Zsolt Szabó den kua e ta bisa ku e islanan a pone prioridat manera seguridat di alimentashon, konektividat i “blue economy”. “Pero, ken ta tuma rienda di e prosesonan aki.” Segun e parlamentario si laga esaki den man di e islanan mes e ta premirá stagnashon debí na e falta di kapasidat pa ehekutá i manehá.”
Mas aleu e ta bisa ku inisiativa chikí ta yuda e islanan, pero si ke resultadonan signifikante mester di proyektonan di mas grandi. Un proyekto pa usa awa di laman pa fria edifisionan por sirbi alabes komo proyekto ta enkurashá agrikultura i hortikultura, Van Haasen a menshoná komo ehèmpel.
E ta menshoná tambe ku den komersio i konektividat tin kosnan ta stanká. “Haf di Kòrsou tin potensial grandi, pero miéntras ku esaki ta habri solamente durante oranan di ofisina no ta saka benefisio for di potensial aki. Miéntras ku e “vliegtax” ku Hulanda ke introdusí ta kologá manera un menasa riba kabes di e paisnan den Karibe.”
Foto:
…Peter van Haasen…
