LONDON, REINO UNI, AFP.- Universidat di Oxford a informá djaluna ku a lansa un eksperimento kaminda a bolbe infektá hendenan ku tabatin Corona vírus den pasado.
E estudio lo opservá kon e sistema inmunológiko lo reakshoná den e boluntarionan aki. Ademas, e sientífikonan lo determiná “eksaktamente na ki momentu e infekshon a sosodé i kuantu vírus e persona a haña”, asina Helen McShane, un profesor di vaccinologia a indiká den un informe.
Tur esnan ku sufri di síntoma lo haña e tratamentu Regeneron kual ta usa pa trata pashèntnan ku COVID-19. Welcome Trust a finansiá e tèstnan di Universidat di Oxford.
Sesentikuater boluntario ku ta fit i sano entre 18 i 30 aña lo keda infektá deliberadamente ku e Corona vírus ku a originá den Wuhan, na China.
Nan lo keda den karentena durante 17 dia den hospital, i lo hasi tèstnan di kurason i pulmon. Despues di esaki nan lo tin diferente sita i lo monitòr nan durante un aña largu.
Un hospital na London a isolá un grupo di voluntario sano i eksponé nan na e vírus. E ensayonan a kuminsá den mart den kolaborashon entre Imperial College London i e kompania hVIVO na Hospital Royal London.