WASHINGTON, MERKA, AFP.- E sientífiko merikano ku ta kombatiendo e pandemia di coronavírus a haña èkstra seguridat despues ku el a haña menasa. E menasanan a yega despues ku el a kontradesí presidente Donald Trump su interpretashon i pronóstiko tokante e krísis.
E servisio di US Marshals a konfirmá ku Anthony Fauci a haña seguridat spesial. Fauci ta e eksperto ku ta representá e kara públiko di e gobièrnu su medidanan kontra e vírus. El a haña un bon reputashon pa e forma kon el a duna informashon basa riba echo tokante e pandemia, kual ya a mata 5.100 merikano.
E dòkter di 79 aña, e eksperto di malesanan veneriko, a wòrdu ataka pa konservadornan despues ku el a kontradesí Trump su aklarashonnan tokante e vírus. El a mustra su desakuerdo públikamente ku Trump su plan pa fleksibilisá e medidanan di karentena desde 14 di aprel. Ademas, el a bagatelisá Trump su promoshon pa remedinan manera hydroxychloroquine i chloroquine komo tratamentunan konfiabel kontra coronavírus. Trump su sostenedonan a ataka Fauci online, akusando e di ta un agente ku kier purba mina e presidente.
