WUHAN, CHINA, AFP.- Ekspertonan di Organisashon Mundial di Salú a yega Wuhan pa studia orígen di e Corona vírus na China, segun e pais a reportá su promé morto kousa pa e vírus den ocho luna.
E bishita di e ekipo di OMS den China ta delikado pa e pais, mirando ku China kier despegá su mes di tur responsabilidat relashoná ku e pandemia ku ya a provoká dos mion morto rònt mundu desde su aparishon den Wuhan na fin di 2019.
E ekipo di OMS tin e mishon pa detektá orígen di COVID-19 i a integrá pa sientífikonan di diferente nashonalidat ku a yega riba un buelo for di Singapore.
E diestres miembronan di e ekipo a keda risibí pa personal di China bistí ku trahe spesial di protekshon. Nan mester a hasi un tèst pa detektá e vírus i mester pasa dos siman den karentena promé ku nan sali riba kaya i hasi e investigashonnan nesesario.
Pero ainda e ekipo no ta kompleto, mirando ku dos miembro a keda pegá na Singapore segun indikashon di OMS. Nan a tèst positivo pa COVID promé ku nan a sali pa China i mester hasi un serie di prueba.
E mishon aki lo dura entre sinku pa seis siman i e meta ta pa buska orígen i no “kulpabel”, segun un di e integrantenan, Fabian Leendertz di Instituto Koch na Alemania.
