Huma ta bai laria durante di un atake aéreo di Israel riba Beirut. Tantu Iran komo Líbano ayera a keda ataká durante dje guera ku ta eskalando den Medio Oriente.
WASHINGTON (AFP).- Gobièrnu di Donald Trump ta insistí ku Merka a ataká Iran pa para “menasanan dirèkt” ku ta bini for dje repúblika islamita, pero ekspertonan a sostené ku segun leinan internashonal e peligernan sitá dor di Washington no ta hustifiká un guera.
Forsanan norteamerikano i israelí dia 28 di febrüari a lansa un kampaña aéreo sumamente grandi kontra di Iran, ku segun Washington tin komo meta pa frena e menasanan nuklear i di misil di Teheran. E ofensiva a eliminá e kabesantenan di gobièrnu iraní, i Trump awor ta eksigí un “entrega inkondishonal”.
White House e siman aki a splika e motibunan ku ,segun nan, a hustifiká e atake. “E desishon ta basá riba akumulashon di vários menasa dirèkt ku Iran a lansa kontra di Merka, i den konvikshon dje presidente, basá riba echonan, di ku Iran ta representá un menasa dirèkt”, segun e bosero merikano Karoline Leavitt. El a menshoná patrosinio iraní di terorismo, su programa di misilnan balistiko i su supuesto esfuerso pa produsí armanan nuklear.
Pero Mary Ellen O’Conell, profesor di Notre Dame University, a trese dilanti ku e atake riba Iran “no tin ningun hustifikashon relashoná ku leinan internashonal”. E ta rekordá ku e lei ta eksigí pa resolvé disputanan internashonal na un manera pasífiko, manera negoshashon òf mediashon, i a asentuá ku e Karta di Nashonnan Uni ta permití uso di forsa solamente ora tin pruebanan bon kla ku ta preparando un atake. “No a presentá nada di prueba’, segun e ta bisa.
Marco Rubio ku otro vershon: Miéntras ku Leavitt ta referí na menasanan di misil, e Sekretario di Estado, Marco Rubio, na komienso dje siman aki a duna otro splikashon: e temor ku un atake israelí kontra di Iran lo por habri kaminda pa represaya kontra di tropanan norteamerikano.
Brian Finucane, asesor di International Crisis Group, ta mustra riba inkonsistensianan den e argumento ei, entre nan ku gobièrnu di Trump a duna vershonnan distinto durante di e dianan. Ademas, el a trese dilanti ku Washington por a konvensé Israel pa no ataká Iran i esei teniendo kuenta ku ta Merka ta duna e gobièrnu di Netanyahu apoyo militar.
Konklushon ta, ku e guera kontra di Iran ta suma na otro intervenshonnan di legalidat dudoso di parti dje gobièrnu di Trump.
