WASHINGTON, MERKA, AFP.- E suspenshon di e vakuna kontra COVID di Johnson & Johnson lo keda suspendé durante por lo ménos un siman mas despues ku miembronan di un pènel di eksperto a bisa ku mester di mas tempu pa analisá e vakuna su posibel asosiashon ku kasonan di pròp di sanger.
Sentro pa Kontrol i Prevenshon di Enfermedat (CDC) a organisá un reunion un dia despues ku outoridat a informá di seis kaso di muhénan ku a desaroyá pròp di sanger serebral den e dos simannan despues ku nan a haña e vakuna. E vakuna ta rekerí solamente un inyekshon i no dos manera e otro markanan.
Mas o ménos 7,2 mion merikano a haña e vakuna i outoridat a informá partisipantenan den e reunion ku a identifiká un di shete kaso di un muhé di 28 aña di edat.
E pènel di eksperto a indiká ku ta nesesario pa hasi mas investigashon mirando e gravedat di e pròpnan di sanger, i mirando ku e otro vakunanan no tin e mesun riesgo di seguridat.
E direktor di CDC Rochelle Walensky a bisa promé ku e reunion na prensa ku e síntomanan ta konsistente ku e efektonan sekundario di e vakuna di AstraZeneca registrá den Europa.
